Tein techpaleuis maj tiyolpakikan kemej kalyetouanij
Maj se takat uan se siuat monamiktikan uan maj kinpiakan konemej, se inetetayokolil Dios tein semi kipia ipatiuj. Kemej yejuatsin kineki maj okachi tiyolpakikan kemej kalyetouanij, ika tamatilis techiluia tein techpaleuis uan techiluia itech se amatajkuilol tein uejkaujya moijkuiloj. Itech nejin tamachtilis tikitaskej seki taman tein tayolmajxitia.
Takat akin tionmonamiktijya, xikontasojta mosiuatsin
“In teyokichuan ma kintasojtatinemikan ninsiuauan ika ne tetasojtalis tenika cada se teyokich mopialitinemi [...]. Porin ne teyokich ten kitasotajtinemi isiuatsin, [...] motasojtatinemi yejua san mismo. Uan amo aken kitauelitstinemi de yejua itakayo san. Ta, [...] motasojtatinemi kuak motekipanoa uan moyekpia” (EFESIOS 5:28, 29).
Takat kinixyekana ikalyetouanij (Efesios 5:23). Se kuali tetakauj, tetasojta uan amo kichia maj mochiua sayoj tein yejua tanauatia, ta kipatiuita isiuatsin, kitekipanoua uan kipaleuia maj kuali momachili. Uan no, mochikaua maj yolpaki uan amo kichia maj nochipa mochiua tein yejua kineki (Filipenses 2:4). Keman tajtoua iuan no kiluia tein kimachilia, tein kinemilia, sayoj ke no kikaki. Amo kualani iuan, amo kiteuia, nion no kiyolxokolia (Colosenses 3:19).
Siuatsin akin tionmonamiktijya, xikonpoujkaita motakauj
“Tesiuau moneki ma momouiskauika iuan iyokich” (EFESIOS 5:33).
Tesiuatsin tapaleuia maj onka yolseuilis itech kalyetouanij keman kipoujkaita itakauj uan kipaleuia keman yejua kiixtalia kichiuas teisa. Uan keman mopoloua amo kipinaujtia, ta kisentoka kipoujkaita uan amo yolijsiui (1 Pedro 3:4). Uan no, keman moneki kiyektaliskej se kuejmol kimati kemanian tajtos uan kichiua ika poujkaitalis (Eclesiastés 3:7).
Amo xikonkajkayaua motakauj oso mosiuatsin
“Takat [...] mosentilis iuan inamik, uan mochiuaskej sayoj se” (GÉNESIS 2:24).
Keman se takat uan se siuatsin monamiktiaj, mochiuaj se kalyetouanij akin semi kuali mouikaj. Yejua ika, nochin omen moneki mochikauaskej para maj nochipa kuali mouikakan. ¿Keniuj? Keman kualtsin monojnotsaskej uan monextiliskej netasojtalis ika seki taman. Amo keman motekaskiaj iuan okse siuat oso okse takat. Keman semej auilnemi semi kitajyouiltia akin iuan monamiktij porin amo uelisok iuan takuaujtamatis uan kinxeloua kalyetouanij (Hebreos 13:4).
Tetatmej xikinmachtikan namokoneuan
“Xikmachti okichpil itech ojti kampa moneki yas, uan keman ueuentsintias amo kikauas” (PROVERBIOS 22:6).
Dios kiniluia tetatmej ke moneki kinmachtiskej ininkoneuan, kemej keniuj tapoujkaitaskej uan kinnextiliaj keniuj kichiuaskej (Deuteronomio 6:6, 7). Komo konet amo tatakamati, akin nantetatmej amo niman xikualanikan ta “ximoijsiuilikan para xikakikan [...]. Pero xiyolikachiakan para xitajtokan uan no xiyolikachiakan para xikualanikan” (Santiago 1:19). Komo moneki nankitakakiltiskej, nankichiuaskej porin nankitasojtaj uan amo porin nankualantokej.
Tekoneuan, xikintakamatikan namotatuan
“Nankonetsitsin, moneki xikintakamatiyakan namotatuan [...] ‘Xikmouistilijtiu motajtsin uan monantsin’”(EFESIOS 6:1, 2).
Tekoneuan moneki kintakamatiskej uan kinpoujkaitaskej inintatuan. Keman kichiuaj, tapaleuiaj maj kalyetouanij yolseujtokan uan maj yolpakikan. Keman konemej moskaltiaj kinextiaj ke kinpoujkaitaj inintatuan keman kinpaleuiaj maj amo teyi kinpolo. Xa ueliskia kiitaskej maj kuali yeto ininchan oso kinpaleuiskej ika tomin keman monekis (1 Timoteo 5:3, 4).
Xa no tikonuelitas
MOKALYETOUANIJ UELIS YOLPAKISKEJ
Xiktemokan Dios uan nanyolpakiskej kemej namikuanij
Ome netajtanilmej tein uelis mitsonpaleuis tejuatsin uan monamik.
TANEJMACHTIJKEJ
¿Keniuj uelis kichiuas takat maj inamik yolseujkanemi?
Tein tapaleuis maj mokalyetouanij yolpakikan moneki okachi ke kipiaskej miak taman.
