“Ijkon tej, ken on tlakatl kitlajsojtla itlalnakayo, no ijki noneki kitlajsojtlas isiuau. Yejuan kitlajsojtla isiuau, sano yejua notlajsojtla. Xakaj nemi yejuan xkitlajsojtla itlalnakayo, yej kitlakualtia niman cuidaroua” (EFESIOS 5:28, 29).

Teueuentsin yejua akin kiyekana ifamilia (Efesios 5:23). Se teueuentsin noneki kitlasojtlas, kitlajpiyas niman kimakas isiuatsin tlen yejua kipoloua. Noijki, teueuentsin nochipa kineki kiyolpaktis niman xsan kineki manochiua tlen yejua kineki (Filipenses 2:4). Ijkuak iuan tlajtoua, kijlia tlen kimachilia niman tlen kinemilia, san ika, noijki kuajli kikaki. Noijki, xkeman kitlauelita, xkimailia nion xkijlia itlaj tlen uelis kiyolkokos (Colosenses 3:19).

“On siuatl no noneki kitlakaitas iueuentsin” (EFESIOS 5:33).

Ijkuak tesiuauj kitlakaita niman kipaleuiya iueuentsin, kichiua ika nochimej mayolpakikan. Niman ijkuak iueuentsin nopopoloua yejua xkipipinaujtia niman xiuan kualani (1 Pedro 3:4). Noijki, ijkuak itlaj xkuelita, kimatstika kemanon kijlis iueuentsin niman ika noneki kitlakaitas (Eclesiastés 3:7).

“Sen tlakatl [...] nosentlalia san sekan iuan isiuau, niman on omemej nochiuaj san se” (GÉNESIS 2:24).

Ijkuak se tlakatl niman se siuatl nonamiktiaj, kiteititiaj ika xkeman noxeloskej. Ika yejon, noneki nokojtiliskej nochipa san sekan nemiskej. ¿Kenon uelis kichiuaskej? Tla noijliaj tlen yemelak kimachiliaj niman noititiaj ika melak notlasojtlaj. Xkeman notekaskiaj iuan yakaj akin xixnamik. Ijkuak yakaj kikajkayaua ixnamik, uelis kichiuas maka sa manotlakaitakan niman hasta manoxelokan (Hebreos 13:4).

“Xmachti mokoneu ken kuajli nouikas aman chika konetl, niman hasta ijkuak ueuentsintias nochipa ijki nouikas” (PROVERBIOS 22:6).

ToTajtsin yokinnauati tajtin kuajli makimiskaltikan inkoneuan niman makimititikan kenon tetlakaitaskej (Deuteronomio 6:6, 7). Ijkuak se konetl xkintlakamati itajuan, yejuamej xnimantsin kualanij, yej kikakij, kuajli kinotsaj niman xkitlaueltsajtsiliaj (Santiago 1:19). Niman, tla kiyektlaliaj, kichiuaskej pampa kitlasojtlaj niman xpampa iuan kualantokej.

“Tekoneuan, xkintlakamatikan nemotajuan [...]. ‘Xtlakaita motataj niman monana’” (EFESIOS 6:1, 2).

Kokonej noneki kintlakamatiskej niman kintlakaitaskej intajuan. Ijkuak ijkon kichiuaj, nochi familia yolpaki. Ijkuak yejuamej yonoskaltijkej, kiteititiaj ika kintlakaitaj intajuan ijkuak kuajli kintlajpiyaj. Kentla ijkuak kitaj kuajli maonia inkal kampa chantij noso ijkuak kinmakaj achijtsin tomin (1 Timoteo 5:3, 4).