“E aroa katoa te au tane i ta ratou uaorai au vaine e tikaʼi, mei to ratou uaorai kopapa; ko tei aroa i tana uaorai vaine, kua aroa aia iaia uaorai. Kare ua e tangata e makitakita i tona uaorai kopapa e teia noaʼi oki; kareka e angai e te akaperepere marie.”​—EPHESIA 5:28, 29.

Ko te tane te upoko o te ngutuare. (Ephesia 5:23) Kare te tane meitaki e tuatua kino atu e te māro. Ka akaperepere aia i tana vaine e ka akono iaia i te pae kopapa e te pae manako. Ka tauta katoa aia i te akamareka i tana vaine e kare iaia uaorai. (Philipi 2:4) Ka akakite aia i tona manako e ka akarongo meitaki me tuatua mai tana vaine. Kare aia e “rotoriri atu” e kare e takino iaia i te pae kopapa e te pae manako.​—Kolosa 3:19.

“E te vaine oki e kauraro aia i tana tane.”​—EPHESIA 5:33.

Me akangateitei te vaine i tana tane e me turu i tana au ikianga, ka akatupu aia i te ‘au i roto i te ngutuare. Me tarevake ana tana tane, kare aia e taakaaka iaia mari ra, ka noo maru ua e ka kauraro atu kiaia. (1 Petero 3:4) Me anoanoia aia kia tuatua ki tana tane no runga i tetai manamanata, ka iki aia i tetai tuatau meitaki e ka tuatua ma te akangateitei.​—Koheleta 3:7.

“Ka piri atu ei [te tangata] ki tana vaine; e ka riro oki raua ei kopapa okotai.”​—GENESE 2:24.

Me akaipoipo tetai tane e te vaine, ka akatupu raua i tetai pirianga vaitata tikai. No reira ka tauta pakari te nga tokorua i te akamatutu i to raua oraanga akaipoipo na te komakoma putuputu ma te aroa e na te takinga meitaki atu i tetai e tetai. Ka vai tiratiratu raua ki tetai e tetai e kare raua e ō atu ki roto i te pirianga ainga i vao ake i te akaipoipo. E mea kino te akaturi. Ka takore te reira i to raua irinaki i tetai e tetai e ka akapueu i te ngutuare.​—Ebera 13:4.

“E apii i te tamaiti i te arataa e tikaʼi iaia kia aere ra; e kia pakari aia ra, kare e akaruke i taua arataa ra.”​—MASELI 22:6.

Kua oronga te Atua i te apainga na te au metua kia utuutu i ta ratou tamariki. Te kapiti maira i te apii anga i te tamariki i te tu tau e te akanoo i te akaraanga meitaki no ratou. (Deuteronomi 6:6, 7) Me taringa turi tetai tamaiti, kare te metua meitaki e viviki i te riri. Mari ra ka tauta aia “kia rapurapu ua . . . i te akarongo, kia tavarevare i te tuatua, kia tavarevare oki i te riri.” (Iakobo 1:19) Me anoanoia kia ako i tana tamaiti, ka rave aia i te reira ma te aroa, eiaa ma te riri.

“E te au tamariki ra, e akarongo atu i to kotou au metua . . . ‘E akangateitei i to metua tane e to metua vaine.’”​—EPHESIA 6:1, 2.

Ka tau te tamariki kia akarongo ki to ratou nga metua e te akangateitei ia raua. Me akapera, ka akatupu ratou i te rekareka i roto i te ngutuare e ka ‘au ua te oraanga ngutuare. Ka akangateitei te tamariki mamaata i to ratou nga metua na te akapapu anga e kua akono meitakiia raua. Penei ka ō mai te tauturu anga ia raua i te kainga e te oronga i te tauturu pae moni me anoanoia.​—1 Timoteo 5:3, 4.