“Varume vanofanira kuda madzimai avo semiviri yavo. Murume anoda mudzimai wake anozvida, nekuti hapana murume akambovenga muviri wake, asi anoupa zvekudya uye anouchengeta.”—VAEFESO 5:28, 29.

Murume ndiye musoro wemba. (VaEfeso 5:23) Asi murume akanaka haabati mudzimai wake zveutsinye. Anokoshesa mudzimai wake uye anomupa zvaanoda pakurarama asingaiti zvinhu zvinoita kuti ashungurudzike. Anoedzawo kuita zvinoita kuti afare pane kungosimbirira pane zvaanoda iye. (VaFiripi 2:4) Anonyatsomuudza zviri pamwoyo pake uye anoteererawo zvinotaurwa nemudzimai wake. ‘Haashatirirwi’ mudzimai wake kana kumurova kana kumuudza magaramwoyo.—VaKorose 3:19.

‘Mudzimai anofanira kuremekedza murume wake zvikuru.’—VAEFESO 5:33.

Kana mudzimai achiremekedza murume wake uye achimutsigira pane zvaanenge asarudza, anoita kuti mumba muve nerugare. Kana murume wake akakanganisa, haamushori asi anoramba ari munyoro achimuremekedza. (1 Petro 3:4) Kana aine zvaanoda kutaura nemurume wake, anonyatsotsvaga nguva yakanaka yekuti adaro, otaura naye achimuremekedza.—Muparidzi 3:7.

“Murume . . . achanamatira kumudzimai wake, uye vachava nyama imwe.”—GENESISI 2:24.

Murume nemudzimai pavanoroorana, vanobva vava neushamwari hwepedyo. Saka vari muwanano vanofanira kushanda nesimba kuti vasimbise ushamwari ihwohwo nekugara vachitaurirana zviri pasi pemwoyo yavo uye kuitiranawo tunhu tunoratidza kuti vanodanana. Vanofanirawo kuratidza kuti vakavimbika nekusaita bonde nemumwe munhu wavasina kuroorana naye. Kuita gumbo mumba gumbo panze kunorwadzisa mumwe wako. Kunoita kuti asavimba newe uye imba inogona kutoparara.—VaHebheru 13:4.

“Dzidzisa mwana nzira yaanofanira kufamba nayo; kunyange kana akwegura haazobvi mairi.”—ZVIREVO 22:6.

Mwari akapa vabereki basa rekudzidzisa vana vavo. Izvi zvinosanganisira kuvadzidzisa kuva neunhu, vachivaratidza muenzaniso wakanaka. (Dheuteronomi 6:6, 7) Kana mwana akaita musikanzwa, mubereki akachenjera haakurumidzi kuita hasha. ‘Anokurumidza kuteerera, ononoka kutaura, uye ononoka kutsamwa.’ (Jakobho 1:19) Kana mubereki akaona kuti mwana ari kuda kutsiurwa kana kurangwa, anozviita nerudo kwete akatsamwa.

“Vana, teererai vabereki venyu . . . ‘Kudza baba vako naamai vako.’”—VAEFESO 6:1, 2.

Vana vanofanira kuteerera vabereki vavo uye kuvaremekedza zvikuru. Kana vana vachikudza vabereki vavo, mumba munova nemufaro nerugare. Vana vanenge vakura vanoratidza kuti vanokudza vabereki vavo nekuva nechokwadi chekuti zvavanoda vazviwana. Izvi zvinosanganisira kuona kuti musha wavo wagara wakanaka kana kuvabatsirawo nemari.—1 Timoti 5:3, 4.