“Waomi pombaka nanga wadɛwɔ oko alemba awɔ hita. Pami kalanga wadɛnde ndjalangaka ndamɛ, nɛ dia ndooko pami kahetsha demba diande hita, koko nde dileshaka ndo dilɔngɔsɔlaka.”​—ƐFƐSƆ 5:28, 29.

Omi mbele owandji wa nkumbo. (Ɛfɛsɔ 5:23) Koko, omi l’ɔlɔlɔ bu awui wolo kana dihikahika. Nde mbɔsaka wadɛnde la nɛmɔ di’efula ndo nde mbokotshɛka ehomba ande oyadi wa lo demba kana wa lo ngandji. Ndo nde salaka nto la wolo dia mbɔngɛnyangɛnya, nde hatshininala lo tshutshuya wadɛnde dia salaka paka kɛnɛ kalangande. (Filipɛ 2:4) Nde sawolaka la nde awui hwe hwe ndo mbohokamɛka etena katɛkɛtande. Nde hawomalɛ “nkɛlɛ k’efula” kana mbɔhɛnyahɛnya oyadi lo demba kana lo tokanyi.​—Kɔlɔsayi 3:19.

“Ndo wadi lo wedi ande pombaka monga la dilɛmiɛlɔ di’efula otsha le omɛnde.”​—ƐFƐSƆ 5:33.

Etena kalɛmiya wadi omɛndɛ ndo kasukɛnde tɛdikɔ tande, nde kimanyiyaka dia nkumbo ndeka monga lo wɔladi. Etena kasala omɛnde munga kɛmɔtshi, nde hawɔnyɔla, koko nde tetemalaka monga la yimba ya wɔlamu ndo la dilɛmiɛlɔ di’efula. (1 Petero 3:4) Etena kalangande sawola l’omɛnde l’ɔtɛ w’okakatanu ɔmɔtshi, nde sɔnaka wonya wa dimɛna wa nsala dui sɔ ndo nde sawolaka la nde la dilɛmiɛlɔ di’efula.​—Ondaki 3:7.

“Pami . . . ayomamatana la wadɛnde, ko vɔ ahende wayoyala demba ɔtɔi.”​—ETATELO 2:24.

Etena katshukana pami la womoto, vɔ mongaka la diɔtɔnganelo dia ma ma. Ɔnkɔnɛ, atshukanyi pombaka nkamba la wolo dia nkeketsha dimama dia diwala diawɔ lo dihwanɛka etema ndo salanɛka towuiwui t’ɛlɔlɔ. Vɔ pombaka nto ntshikala la kɔlamelo l’amasawɔ lo ntona diatosala loseka l’andja wa diwala. Ɔnɛ lashisha kɔlamelo salɛka osekande kɔlɔ. Dui sɔ ndanyaka wɛkamu wele lam’asawɔ ndo koka kaanga mbidja diatɔnelo lo nkumbo.​—Hɛbɛru 13:4.

“Etsha ɔna lo mboka kahombande ntshɔ; kaanga lam’ayondonga opalanga nde hatokitakɔ.”​—TOKEDI 22:6, nɔtɛ.

Nzambi akasha ambutshi ɔkɛndɛ wa mbetshaka anawɔ. Dui sɔ mendanaka nto ndo la mbowaetsha woho wahombawɔ monga la kɛwɔ y’amɛna ndo mbasha ɛnyɛlɔ ka dimɛna.  (Eohwelo k’Ɛlɛmbɛ 6:6, 7) Etena kasala ɔna ɔmɔtshi dui dia kɔlɔ, ombutshi wa lomba homala lo tshambandeko. Nde mongaka “suke dia mpokamɛ, ɔkɔkɛ dia ntɛkɛta ndo aha mboka nkɛlɛ esadi.” (Jakɔba 1:19) Naka ombutshi amboshikikɛ dia ekɔ ohomba mbisha dilanya, kete nde pombaka nsala dui sɔ la ngandji, koko aha etena kende la nkɛlɛ.

“Ana, nyokitanyiya ambutshi anyu . . . ‘lɛmiya shɔ la nyɔ.’”​—ƐFƐSƆ 6:1, 2.

Ana pombaka nkitanyiya ambutshi awɔ ndo mbasalɛka akambo la dilɛmiɛlɔ di’efula. Etena kalɛmiya ana ambutshi awɔ, vɔ salaka dia ɔngɛnɔngɛnɔ w’efula monga langelo ndo salaka dia diɔtɔnganelo dia dimɛna ndo wɔladi monga lo nkumbo. Ana w’epalanga nɛmiyaka ambutshi awɔ lo ndjashikikɛ dia vɔ wekɔ lo mbakokɛ dimɛna. Dui sɔ mbeyaka mendana la mbalɔngɔsɔlɛka mvudu yawɔ kana mbakimanyiyaka la yema ya dikuta lo dikambo dia ehomba awɔ.​—1 Timɔte 5:3, 4.