Lekil beiltasel sventa xmuyubaj li utsʼ alalile
Li nupunel xchiʼuk li alab nichʼnabiletike jaʼ jun matanal yakʼoj li Jpasvanej kuʼuntike. Ta skoj ti tskʼan ti masuk to xmuyubaj li utsʼ alaliletike, yakʼojbutik lekil tojobtaseletik. Taje te ta jtatik li ta voʼneal chʼul livro ti jaʼ li Skʼope. Li ta xchanobil liʼe, ta jkʼeltik batel junantik li tojobtaseletik taje.
Malalil, kʼano me li avajnile
«Jaʼuk me jech akʼo skʼan yajnilik li malaliletik jech kʼuchaʼal skʼanoj sbekʼtal stukike. Skʼanoj sba stuk li buchʼu skʼanoj yajnile, yuʼun muʼyuk buchʼu spʼajoj li sbekʼtal stuke, ti kʼusie, tsmakʼlin xchiʼuk chkʼuxubin» (EFESIOS 5:28, 29).
Jaʼ jolil ta utsʼ alalil li malalile (Efesios 5:23). Li jun lekil malalile chkʼuxubin li yajnile, chakʼbe li kʼusitik chtun yuʼune xchiʼuk ti junuk noʼox yoʼonton yuʼune. Jech xtok, chakʼ persa ti xmuyubajuk noʼox yuʼune xchiʼuk chichʼbe ye kʼalal oy kʼusi tsnop tspase (Filipenses 2:4). Kʼalaluk chchiʼin ta loʼile, chalbe li kʼusi tsnope xchiʼuk ti kʼu yelan chaʼi sbae, pe maʼuk noʼox, yuʼun chchikintabe li kʼusi chal yajnile. Mu ta aniluk ch-ilin ta stojolal, mi jaʼuk tstsak ta majel o ti toj kʼuxik xa kʼusi chalbee (Kolosenses 3:19).
Ajnilal, ichʼo me ta mukʼ li amalale
«Akʼo me yichʼ lek ta mukʼ smalal li ajnilale» (EFESIOS 5:33).
Kʼalal chichʼ ta mukʼ smalal li jun ajnilal xchiʼuk ti tstsak ta mukʼ li kʼusi chkʼot ta nopel yuʼune, jaʼ chkoltavan sventa junuk noʼox yoʼontonik li ta yutsʼ yalale. Mi oy kʼusi muʼyuk lek bat ta pasel yuʼun li smalale, muʼyuk bu chkʼexlaltas, yuʼun jech-o chichʼ ta mukʼ xchiʼuk muʼyuk chkap sjol (1 Pedro 3:4). Jech xtok, kʼalal mi oy kʼusi skʼan xchapan xchiʼuk li smalale, tsabe lek yorail xchiʼuk ta slekil yoʼonton tskʼopon (Eklesiastes 3:7).
Mu me xamukul sati li anup achiʼile
Li vinike «jaʼ xa chchiʼin-o ta naklej li yajnile, vaʼun tspas ta jun sbekʼtalik li chaʼvoʼike» (JENESIS 2:24).
Kʼalal chnupun li jun vinik xchiʼuk jun antse, jaʼik xa jun utsʼ alalil chkʼotik. Jaʼ yuʼun, xchaʼvoʼalik skʼan xakʼik persa sventa jmojuk oyikuke. ¿Kʼuxi chutik? Jaʼ ti xalbe sbaik li kʼusi oy ta yoʼontonike xchiʼuk ti xakʼbe sba yuni motonik ta jujuntale. Muʼyuk me lek mi chchiʼinik ta vayel yan krixchano ti maʼuk snup xchiʼilike. Yuʼun li mukul satiele toj chopol, kʼux chbat ta oʼontonal, tsokes li utsʼ alalile xchiʼuk muʼyuk xa bu tspat yoʼontonik ta jujuntal (Ebreos 13:4).
Totil meʼiletik, chanubtaso li avalab anichʼnabike
«Chanubtaso bu beal skʼan stam batel li kereme; vaʼun muʼyuk chkʼejpʼuj lokʼel ta be akʼo mi mol xa ox» (PROVERBIOS 22:6).
Li Diose yakʼojbe ta sba totil meʼiletik ti xchanubtas li yalab xnichʼnabike, ti te tsakal skʼoplal ti xakʼbeik xchan lekil talelaletike xchiʼuk ti xakʼbeik ta ilel ti lekuk stalelal li stukik eke (Deuteronomio 6:6, 7). Mi mu xchʼun mantal li jun olole, li lekil totil meʼiletike muʼyuk me ch-echʼ ta mas ti kʼu yelan chakʼbeik mantale. Yuʼun oy ta yoʼontonik xchikintaik, tsnopik lek li kʼusi chalike xchiʼuk muʼyuk bu ch-ilinik ta anil (Santiago 1:19). Mi kʼot ta nopel yuʼunik ti chakʼbeik kastigoe, jaʼ ta skoj ti skʼanojike maʼuk ti kapemik ta stojolale.
Alab nichʼnabiletik, chʼunbeik me smantal li atot ameʼike
«Alab nichʼnabiletik, chʼunbo me smantal atot ameʼik [...]. ‹Ichʼo ta mukʼ atot ameʼ›» (EFESIOS 6:1, 2).
Li alab nichʼnabiletike skʼan xchʼunbeik smantal xchiʼuk xichʼik ta mukʼ li stot smeʼike. Kʼalal jech tspasike, jun noʼox yoʼontonik li yutsʼ yalalike xchiʼuk xkuxet noʼox yoʼontonik. Kʼalal mi laj xa ox sta svaʼlejik li alab nichʼnabiletike, jtos ti kʼu yelan chakʼik ta ilel ti yichʼojik ta mukʼ stot smeʼike, jaʼo kʼalal chchabiik sventa lekuk noʼox oyike. Jech kʼuchaʼal liʼe, tskʼelik ti lekuk noʼox ti bu nakalike o chakʼbeik li kʼusitik chtun yuʼun li stot smeʼike (1 Timoteo 5:3, 4).
Xuʼ van chakʼupin skʼelel xtok liʼe
¿KʼUXI XUʼ XIJMUYUBAJ TA KUTSʼ KALALTIK?
Nopajanik ta stojolal Dios sventa xamuyubaj ta anupunelik
Oy chaʼtos kʼusi skʼan xajakʼbe aba ti jaʼ tskoltaot ta anupunele.
LI JKʼEL˗OSIL TA TOYOLE
¿Kʼusi xuʼ xapas yoʼ junuk yoʼonton li avajnile?
Sventa junuk yoʼonton li avutsʼ avalale, maʼuk tsots skʼoplal ti lekuk oyoxuk ta takʼine.
KʼUSITIK TSJAKʼIK TA SVENTA VIVLIA
¿Mi oy ta yoʼonton Dios ti jchabi jtot jmeʼtik mi malubemik xae?
Li Vivliae chalbe skʼoplal viniketik xchiʼuk antsetik ti la xchabi li stot smeʼike xchiʼuk chakʼ lekil tojobtaseletik.
