“Azinai ba maccaasiyo ba bollaadan siiqanau bessees; ba machchiyo siiqiyaagee bana siiqees. Aissi giikko, ba bollaa ixxiya asi mulekka baawa; shin . . . ooninne ba bollaa mizeesinne naagees.”—EFISOONA 5:28, 29.

Azinay ba soo asawu huuphe. (Efisoona 5:23) SHin loˈˈo azinay meqettaa iita woy laˈatettaa diggiyaagaa gidenna. I ba machchiyo nashshees, qassi asatettaabaaninne qofan iyyo koshshiyaabaa kunttees. I ta giidoogaa xallay hano giidi zozzu giyoogaappe, O ufayssanawu keehi baaxetees. (Piliphphisiyuusa 2:4) I bawu siyettiyaabaanne ba qofaa iyyo qoncciyan yootees, qassi A yootiyoobaa siyees. I bolli ‘hanqquwan suullenna’ woy asatettaaban woykko meqetti baynnabaa haasayiyoogan O qohenna.—Qolasiyaasa 3:19, NW.

“Maccaasa ubbaikka bantta azinaa azinaa bonchchanau bessees.”—EFISOONA 5:33.

Issi machchiya ba azinaa bonchchiyaabanne I kuuyiyooban maayettiyaaba gidikko, so giddon sarotettay deˈanaadan maaddawusu. I balabaa oottikko, A ubbatoo ashkkenne bonchchiyaaroppe attin karukku. (1 PHeexiroosa 3:4) Issi metuwaabaa ayyo yootanawu koyiyo wode, loˈˈo wodiyaa doorawusu, qassi bonchchuwan awu yootawusu.—Eranchchaa 3:7.

“Asi . . . , ba machcheera issippe de7ees; eti naa77ai issi asho gidoosona.”—DOOMETTAABAA 2:24.

Attumaageenne maccaara aqo oyqqiyo wode, eta dabbotay keehi minnees. Yaatiyo gishshawu, aqo laggeti issoy issuwaara wozanappe haasayiyoogaaninne issoy issuwawu kehiyoogan bantta aqo deˈuwaa minttanawu ubbatoo baaxetana koshshees. Ba aqo lagge gidenna uraara mattumaa gayttennan aggiyoogankka issoy issuwawu ammanettana koshshees. Ba aqo laggiyawu ammanettenna uri aqo deˈuwan daro metuwaa kaalettees. Hegee ammanettennaadaaninne so asay shaahettanaadan oottana danddayees.—Ibraawe 13:4.

“Na7i waanidi de7ana bessiyaakko tamaarissa; yaatikko, i cimidikka hegaa aggenna.”—LEEMISO 22:6.

Yelidaageeti bantta naata loohissanaadan Xoossay etawu aawatettaa immiis. Hegee eti waani deˈanaakko tamaarissiyoogaanne etawu loˈˈo leemiso gidiyoogaa gujjees. (Zaarettido Wogaa 6:6, 7) Issi naˈi mooriyo wode, akeekanchcha gidida yelidaageeti bessiyaagaappe aaruwan hanqqettokkona. I woy A ‘siyanawu eesotoosona; shin haasayanawunne hanqqettanawu eesotokkona.’ (Yaaqooba 1:19) Yelidaageeti bantta naata seerana koshshikko, hanqquwan gidennan siiquwan seerana koshshees.

“Naatoo, inttena yelidaageetuyyo . . azazettite . . . ne aawaanne ne aayyiyo bonchcha.”—EFISOONA 6:1, 2.

Naati banttana yelidaageetuyyo azazettananne wozanappe eta bonchchana koshshees. Naati banttana yelidaageeta bonchchiyo wode, so giddon ufayssaynne sarotettay deˈanaadan oottoosona. Gamma gakkida naati yelidaageeti eta loytti dichchidoogaa yootiyoogan eta bonchchoosona. Hegee eti deˈiyo keettay loˈˈo gidanaadan maaddiyoogaa woy koshshiyaabaa kunttanawu miishshan eta maaddiyoogaa gujjiyaaba gidana danddayees.—1 Ximootiyoosa 5:3, 4.