“Sadang higugmaon han mga bana an ira asawa pariho han ira kalugaringon nga lawas. An tawo nga nahigugma ha iya asawa nahigugma ha iya kalugaringon, kay waray pa tawo nga nangalas ha iya kalugaringon nga lawas, lugod iya ginpapakaon ngan ginmamayuyo ito.”​—EFESO 5:28, 29.

An bana an ulo han pamilya. (Efeso 5:23) Pero an maopay nga bana diri mapintas o naruruyag nga hiya la pirme an masunod. Ginpapabilhan niya an iya asawa ngan gin-aataman hin maopay an iya materyal ngan emosyonal nga panginahanglan. Nangangalimbasog liwat hiya nga mapalipay an iya asawa ngan diri namimirit pirme nga buhaton an iya karuyag. (Filipos 2:4) Iginsusumat niya ha iya asawa an iya inaabat ngan ginhuhunahuna ngan namamati kon nagyayakan hiya. Diri hiya ‘sobra nga nasisina’ ha iya, ngan diri niya hiya ginpapasakitan ha pisikal o emosyonal.​—Colosas 3:19.

“An asawa sadang magkaada daku nga respeto ha iya bana.”​—EFESO 5:33.

Kon ginrirespeto han asawa an iya bana ngan ginsusuportaran an iya mga desisyon, nabulig hiya nga magin mamurayawon an pamilya. Kon nagsasayop an iya bana, diri niya hiya ginmiminos, lugod nagpapabilin hiya nga malumo ngan may respeto. (1 Pedro 3:4) Kon kinahanglan niya makiistorya ha iya bana mahitungod ha usa nga problema, namimili hiya hin maopay nga panahon ngan nagyayakan nga may respeto.​—Eclesiastes 3:7.

“An lalaki . . . matampo ha iya asawa, ngan hira magigin usa nga unod.”​—GENESIS 2:24.

Kon nagpapakasal an lalaki ngan babaye, nagkakaada hira duok gud nga relasyon. Salit kinahanglan mangalimbasog an mag-asawa nga tipigan nga marig-on an ira pag-asawa pinaagi han kinasingkasing nga pag-istoryahay ngan mahigugmaon nga mga buhat. Kinahanglan liwat hira magin maunungon ha usa kag usa pinaagi han diri pakighilawas ha diri nira padis. Nakakasakit gud an pagin diri maunungon. Nakakawara ito han pagtapod ngan nakakabungkag han pamilya.​—Hebreo 13:4.

“Bansaya an bata ha dalan nga angay niya laktan; malagas man hiya, diri hiya mabaya hito.”​—PROBERBIOS 22:6.

Iginhatag han Dios ha mga kag-anak an responsabilidad ha pagbansay han ira mga anak. Upod hito an pagtutdo ha ira hin maopay nga pamatasan ngan pagin maopay nga ehemplo ha ira. (Deuteronomio 6:6, 7) Kon an usa nga bata nagpipinasaway, an maaramon nga kag-anak diri sobra nga nareak. “Alisto [hiya] ha pagpamati, mahinay ha pagyakan,  diri madagmit masina.” (Santiago 1:19) Kon kinahanglan disiplinahon han kag-anak an iya anak, ginbubuhat niya ito ha mahigugmaon nga paagi, diri tungod kay nasisina hiya.

“Mga anak, magin masinugtanon kamo ha iyo mga kag-anak . . . ‘Pasidunggi an imo tatay ngan an imo nanay.’”​—EFESO 6:1, 2.

Kinahanglan sugton han mga anak an ira mga kag-anak ngan trataron hira nga may daku nga respeto. Kon ginpapasidunggan han mga anak an ira mga kag-anak, nakakabulig hira nga magin malipayon ngan mamurayawon an pamilya. Ginpapasidunggan han adulto nga mga anak an ira mga kag-anak pinaagi ha pagsiguro nga namamangnoan hira hin maopay. Bangin upod hito an pagbulig ha ira ha pagmintinar han ira balay o paghatag ha ira han ginkikinahanglan nga pinansyal nga bulig.​—1 Timoteo 5:3, 4.