“Beno landa . . . kulolulana na ntima ya mvimba ata muntu mosi kele na makambu ti muntu ya nkaka.”​—BAKOLOSAI 3:13.

Beto yonso ke salaka bifu. Beto lenda pesa bantu ya nkaka makasi, bo mpi bo lenda pesa beto makasi. Yo ke tendula nde, beto yonso fwete lolulaka bantu ya nkaka mpi beto ke zolaka mpi nde bantu ya nkaka kulolula beto. Kana beto lolula muntu yina pesaka beto makasi, beto ta kangila yandi ve kimbeni na ntima. Beto ke ‘vutulaka ve mbi sambu na mbi,’ mpi beto ke yibusaka ve mbala na mbala muntu yina salaka kifu kifu na yandi. (Bar 12:​17) Kansi inki beto lenda sala kana muntu mosi lwadisaka beto ngolo na ntima mpi beto ke kuka ve kuvila yo? Beto fwete solula ti yandi na luzitu yonso diambu yango kaka beto ti yandi. Lukanu na beto fwete vanda ya kutula ngemba, kansi ya ve ya kumonisa nde yandi kele ti foti.—Baroma 12:18.

“Ti kudikulumusa yonso beno tadila bankaka nde bo me luta beno.”—BAFILIPI 2:3.

Kana beto kele bantu ya kudikulumusa mpi beto ke zitisa bantu ya nkaka, bo ta sepela kuvanda ti beto. Bo ke zabaka nde beto ta sadila bo mambu na mawete mpi na luzitu mpi nde beto ta lwadisa bo ve na ntima na luzolo yonso. Kana beto ke yindula nde beto me luta bantu ya nkaka to kana beto ke zola kaka nde  mambu kusalama mutindu beto ke zola, beto ta wakana ve ti bantu ya nkaka mpi mavwanga ta basika. Bantu ta sepela ve kuvanda ti beto mpi beto ta vanda ve ti banduku mingi to mpi beto ta vanda ve ata ti nduku mosi.

“Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.”—BISALU 10:34, 35.

Muntu yina me salaka beto ke monaka ve nde ndonga mosi buna ya bantu me luta bantu ya nkaka sambu bo kele bantu ya insi ya nkaka, ya ndinga ya nkaka, ya mpusu ya nkaka, sambu bo kele bamvwama to bansukami, sambu bo me tangaka to ve. “Na nzila ya muntu mosi, yandi salaka makanda yonso ya bantu.” (Bisalu 17:​26) Yo ke tendula nde, bantu yonso kele bampangi. Kana beto ke sadila konso muntu mambu na luzitu mpi na mawete, yandi ta vanda na kiese, beto mosi mpi ta vanda na kiese mpi beto ta sepedisa muntu yina me salaka beto.

“Beno lwata . . . mawete.”—BAKOLOSAI 3:12.

Kana beto kele bantu ya mawete, bantu ya nkaka ta kudiwa mbote na lweka na beto. Bo ta wa ve boma na kusolula ti beto mpi nkutu na kuvutula beto na nzila sambu bo me zaba nde beto ta tudila bo ve makelele. Ebuna kana muntu mosi me wila beto makasi, beto lenda sala mambu na mawete, mpidina beto lenda lembika yandi. Bingana 15:1 ke tuba nde: “Mvutu ya pima ke manisaka nganzi, kansi ngogo ya nku ke tedimisaka makasi.”

“Kiese ke vandaka mingi na kupesa, kansi na kubaka kiese ke vandaka fioti.”—BISALU 20:35.

Bubu yai bantu kele lukasi mpi ke yindulaka kaka mambote na bo mosi. Kansi bantu ya ke vandaka na kiese ya kieleka kele bantu yina ke kabaka. (Luka 6:38) Bantu yina ke kabaka ke vandaka na kiese sambu bo ke zolaka bantu kuluta bima ya kinsuni. Zola yina ke pusaka bo na kupesa bantu ya nkaka mersi mpi na kumonisa nde bo ke sepelaka ntangu bantu ya nkaka ke kabilaka bo. (Bakolosai 3:15) Kudiyula nde, ‘Keti mono ke zolaka kuvanda ti bantu yina ke tubaka ve mersi mpi ke kabaka ve, to mono ke zolaka kuvanda ti bantu yina ke kabaka mpi ke pesaka bantu ya nkaka mersi?’ Diambu yai ke longa beto nki? Vanda ti bikalulu yina nge ke sepelaka nde bantu ya nkaka kuvanda ti yo.—Matayo 7:12.