”Hewaʼae na so mbörö waʼabao dödömi, böi tebulö . . . miʼefaʼö zala nawömi soroi ba dödö.”​—KOLOSE 3:13.

Dozi ita no tafalua zala. Te no irai taʼafökhöiʼö dödö niha böʼö mazui no irai laʼafökhöiʼö dödöda. Andrö wa moguna faoma taʼefaʼö zala nawöda. Na no taʼefaʼö zala niha böʼö, lö saʼae abao dödöda khönia. Lö ’tasulöni zi lö sökhi awönia si lö sökhi’, ba lö itörö-törö tödöda saʼae zala si no ifalua. (Roma 12:17) Hizaʼi, hewisa na afökhö sibai dödöda ba abua khöda wangolifugö si no ifalua andrö? Moguna tahaogö wahuhuosa khönia ba zi ha darua ita. Ohitö dödöda enaʼö atulö ita khönia, tenga ba wangalui haniha zatulö ba haniha zi sala.​—Roma 12:18.

”Miʼide-ideʼö ami, enaʼö alawa niha böʼö miwaʼö tödömi.”​—FILIFI 2:3.

Na so khöda wangide-ngideʼö, aoha khöda wamosumange niha böʼö. Na tafalua daʼö, omasi niha fahuwu khöda. Laʼila wa sökhi gamuatada khöra, taʼameʼegö tödö ira ba lö taʼodödögö wangafökhöiʼö tödöra. Hizaʼi, na tawaʼö tödöda wa abölö pade ita moroi ba niha böʼö mazui taʼalui zi  möna ita samösa, tola alua watötöisa. Tola manö lafandröndröu ira khöda ba lö omasi ira fahuwu.

”Lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.”​—HALÖWÖ ZINENGE 10:34, 35.

Lö omasi Zomböi yaʼita na ifaböʼö-böʼöni ita moloʼö soi, li, status sosial hegöi laʼa-laʼa guli. ”Moroi ba zi samösa niha ifazökhi fefu soi.” (Halöwö Zinenge 17:26) Andrö wa tola mufotöi ita fefu si fatalifusö. Daʼö mbörö wa tafosumange fefu niha böʼö ba sökhi dödöda khöra. Na tafalua daʼö, tola omuso dödö niha böʼö hegöi Somböi yaʼita. Tola göi monönö waʼomuso dödöda.

’Miʼokhögö . . . falöʼalio mofönu.’​—KOLOSE 3:12.

Na lö alio mofönu ita, omasi niha fariawö khöda. Lö alawö fahuhuo ira khöda ba laʼamenesi ita börö me laʼila lö alio abao dödöda. Na so niha sofönu khöda, tola alö wönunia na tahaogö-haogö wanema linia. Imane ba Gamaedola 15:1, ”Fanema li nihaogö ba möi fangalösi wönu, hizaʼi fehede si lö baga tobali fangandrö wönu.”

”Ohahau dödö ba wameʼe moroi ba wanema.”​—HALÖWÖ ZINENGE 20:35.

Ato niha iadaʼa, ha tana khöra laʼalui ba lö laʼera-era niha böʼö. Lawaʼö tödöra wa daʼö zameʼe khöra faʼomuso dödö. Hizaʼi sindruhunia, awena ohahau dödö zi samösa niha na abölö tohude niha böʼö wamaiginia moroi khönia samösa mazui moroi ba gokhöta. Daʼö dandra wa yaʼia andrö niha soböwö. (Luka 6:38) Baero daʼö, na so niha samalua si sökhi khönia, lö aetu iforomaʼö wangandrö saohagölö. (Kolose 3:15) Tandraigö angeragö: ’Haʼökhö manö omasido fariawö? Hadia ba niha sobouʼa ba si lö mangila mangandrö saohagölö mazui ba niha soböwö ba si lö aetu mangandrö saohagölö?’ Rahu-rahunia, na omasiʼö so nawöu niha soböwö ba si lö mamalö mangandrö saohagölö, yatobali göi ndraʼugö simane daʼö.—Mataiʼo 7:12.