“অভাৱত পৰা লোকক দান কৰিবলৈ সমৰ্থ হবৰ কাৰণে, নিজ হাতেৰে সদ্‌ব্যৱসায়ত পৰিশ্ৰম কৰক।”—ইফিচীয়া ৪:২৮.

আমি পৰিশ্ৰম কৰাটো ঈশ্বৰে বিচাৰে। তেওঁৰ পৰামৰ্শ পালন কৰিলে আমাৰেই লাভ হʼব। পৰিশ্ৰম কৰিলে আমি নিজৰ আৰু পৰিয়ালৰ প্ৰয়োজনীয়তা পূৰ কৰিব পাৰিম আৰু আনকো সহায় কৰিব পাৰিম। আমি নিজৰ চাকৰি হেৰুৱাবলগীয়া নহʼব, কিয়নো বʼছে আমাৰ কামৰপৰা আনন্দিত হʼব। শাস্ত্ৰত লিখা কথাষাৰ একেবাৰে সঁচা যে এজন ব্যক্তিয়ে পৰিশ্ৰমৰ যি ফল পায়, সেয়া “ঈশ্বৰৰ দান হয়।”—উপদেশক ৩:১৩.

“আমাৰ সদবিবেক, আৰু সকলো বিষয়তে সদাচৰণ কৰিবলৈ আমাৰ ইচ্ছা আছে।”—ইব্ৰী ১৩:১৮.

এজন বিশ্বাসী ব্যক্তিৰ কোনো কথাৰ ভয় নাথাকে। তেওঁ ভাল টোপনি লʼব পাৰে আৰু তেওঁ মনৰ শান্তি লাভ কৰে। ইয়াৰ উপৰিও, লোকসকলে তেওঁক ভৰসা কৰে আৰু তেওঁক সন্মান কৰে। কিন্তু এজন বিশ্বাসঘাত কৰা ব্যক্তিয়ে নিজৰ মান-সন্মান নিজে হেৰুৱায়। তেওঁ কিবা ভুল কৰিলে বুলি তেওঁৰ বিবেকে সদায় খুচি থাকে। তেওঁ ধৰা পৰিব বুলি তেওঁক সকলো সময়তে ভয় লাগি থাকে।

“তোমালোকৰ স্বভাৱ নিৰ্ল্লোভ হওক; তোমালোকৰ যি আছে, তাতে সন্তুষ্ট হৈ থাকা।”—ইব্ৰী ১৩:৫.

খোৱা-বোৱা আৰু আন প্ৰয়োজনীয়তাবোৰ পূৰ কৰিবলৈ টকা-পইচাৰ প্ৰয়োজন হয়। কিন্তু টকা-পইচাৰ প্ৰতি লোভ কৰিলে এজন ব্যক্তিয়ে বেয়া পৰিণাম ভুগিবলগীয়া হʼব পাৰে। যদি তেওঁ দিনে-ৰাতিয়ে টকা-পইচা কমোৱাত লাগি থাকে, তেনেহʼলে নিজৰ পৰিয়ালক সময় দিব নোৱাৰিব। তেওঁৰ বিবাহিত জীৱনত সমস্যা আহিব পাৰে আৰু তেওঁৰ স্বাস্থ্যও বেয়া হʼব পাৰে। (১ তীমথিয় ৬:৯, ১০) টকা-পইচাৰ প্ৰতি লোভ কৰিলে এজন ব্যক্তিয়ে বিশ্বাসঘাত কৰিব পাৰে। সেইবাবে, এজন বুদ্ধিমান ব্যক্তিয়ে এইদৰে কৈছিল, “বিশ্বাসী লোকে অনেক আশীৰ্ব্বাদ পায়; কিন্তু চহকী হবলৈ খৰ কৰা লোকে দণ্ড নোপোৱাকৈ নাথাকিব।”—হিতোপদেশ ২৮:২০.

“তুমি সেই সকলোকে তোমাৰ চকুৰ পৰা আঁতৰ হবলৈ নিদিবা; তুমি বুদ্ধি-কৌশল আৰু বহুদৰ্শিতাক যত্নেৰে ৰাখা।”—হিতোপদেশ ৩:২১.

পঢ়া-শুনা কৰি আমি নিজৰ ভৰিত নিজে থিয় হʼব পাৰোঁ আৰু নিজৰ পৰিয়ালৰো চোৱা-চিতা কৰিব পাৰোঁ। কিন্তু উচ্চ শিক্ষা লʼলে আমি আনন্দত থাকিম বুলি কেতিয়াও নিশ্চিতভাৱে কʼব নোৱাৰোঁ। যদি আমি জীৱনত সফলতা লাভ কৰিব বিচাৰোঁ, তেনেহʼলে ঈশ্বৰৰপৰা শিক্ষা লোৱা উচিত। পবিত্ৰ শাস্ত্ৰত লিখা আছে যে যিজনে ঈশ্বৰৰ কথা শুনে, “সেই মানুহে কৰা সকলো কৰ্ম্ম সাম্ফল হয়।”—গীতমালা ১:১-৩.