Adundehani lun gunda wamá lau wámati
Sun wagía, meberesenga anhein mamarieidungidiwa lubéi, maríeihadiwa lan, nibureingidiwa lan o wéiyaadiwa lan yebe, busentiwa lun gunda wamá lidan wabagari. Ani busenti giñe Le adügübaliwa lun ítara lan wasandiragun woungua. Ligía rúhali lubéi adundehani buiti woun.
Aban humá nadagimeinti benefati
“Luadigimarida lau arumani lun lagüriagun lungua, lun giñe gayara lan líderaguniña ha gudemebaña” (ÉFESUNA 4:28).
Ínchaha lumutiwa Le adügübaliwa lun warihini wadagimanu kei aban katei buiti. Ka uagu? Ladüga dan benefa lan aban gürigia lun lagüriagun lungua hama liduheñu, gúndaati lasandiragun lungua. Gayaraati líderagun aban gürigia le mégeihabubei. Gebegitiña gürigia benefatiña lun hayubudiri ani ligía ménrengun lubéi lun hakipuruni hawadigimari. Inarüni le tariñagubei Lererun Bungiu lunti lan warihini buiti le líchugubei wawadigimari woun ladüga “rúrügü liñalin Bungiu woun” (Apurichihati 3:13).
Buidulá hóuserun lidan sun katei
“Chouru wamuti luagu darangilañu liña lan waritagun kei busén wabéi buidu lan wóuserun lidan sun katei” (EBÜRÉU 13:18).
Anhein buidu lubéi wóuserun lidan sun katei, darangilubei wasaminan, buídubei wasandiragun woungua ani warumuguba lau darangilaü sagü guñoun. Lanwoun lira, inebetiwa houn amu, afiñe hagía wawagu. Ha mabuidunbei hóuserun lidan sun katei, féridi hamuti chansi lun hagundaarun lau burí katei le. Gayaraati wuriba lan hasaminan ani hanufude hamá luéi lasubudirúniwa gadurun hamá.
Ariha huméi seinsu kei lubudubu
“Míchiga huméi hínsiñehabu luagun seinsu; gunda humá lau le húmati” (EBÜRÉU 13:5).
Mégeitiwa seinsu lun wagañeihan éigini luma amu burí katei, lau sun lira, denchati “línsiñegu seinsu”. Gayaraati ladügün lun layusuruni aban gürigia liibe-agei lidaani luma lere áluaha lanwoun lumegen. Gayaraati ladügün lafuudun luagu umegeguni, lun lagadeiruni lamarieidun, lagidaruni dan le lunbei lásügürüni hama lisaanigu íbini lagadeiruni látuadi (1 Timotéu 6:9, 10). Anha, ha hínsiñehabubaña lun seinsu, gayarabei hábürühan lidoun óuchawaguni lun hóuserun wuriba lidan somu katei. Ariñagati aban chu tau: “Gürigia ha hemenigiwati hawagu, ladimurehóuba buiti hawagu; ánhaña ha afuudubaña luagu irisini, meredebaña mabeichúnga” (Ariñawagúni 28:20).
Anúadira huméi arufudahani le buídutimabei
“Ragüba luagu lichú aau luma gunfurandaü súnwandan” (ARIÑAWAGÚNI 3:21).
Le wabusenrubei wibihin lídangiñe aban furendei buiti lun wadügüni wadasin kei lubudubu luma lun agübürigu wamá ha buítiña. Lau sun lira, mámatima arufudahani le adügübei lun gunda wamá o lun chóuruñu lan wawinwandun. Lun buidu lan lidin woun lidan le wadügübei lidan wabagari, megei wamuti larufudahan Bungiu. Ariñagatu Lererun Bungiu gúndaatima hamá gürigia ha aganbubalin Bungiu lidan sun le hadügübei (Sálumu 1:1-3).
Háfuga hínsiñebei lan giñe le hun
GARÜDIA AWISAHATU
Ida luba wagundaarun lau wadagimanu hǘrüti
Ariha huméi adundehani buiti le tíchugubei Bíbülia lun hadarirun ugundani lidan huadigimari.
