Inlahen Hī Yěi Hòṅ Ṙamlōn
Ṙòkhöre in hòṅ ṙāmlōn pôrò ṙālö, tököiny, pôrò töpīhövö hēk töt pīhövö inrē. Ngati lōn an inrē ngam Vamīlen hī, lökten ò nö kētö inlēnö hī.
Ötkô Öi Ṙāhata La-evṙen
“Hökngen ò pöri lahëḵ nö la-evṙen, hakôtö tīre tö tölöök, hòṅ ò nö huveū-en nö kē-ĕkūö ngam [töhāṅten].”—EFISÖS 4:28.
Lōnuvö ngam Tēv tö hī la-evṙen. Yöölen ayī-ö yěi hang ṙô ò. Yē hī la-ënuvö, ngaich mihôiṅ min öi hateūngö nup kuilōn ngam mikūönöre hēk yip hol hī tö hòṅ hayöökaṙen. Öthō inrē ṙānyu ṙā-ang el kinmānöre, pò öp Pôs nö ṙāmlōn nö in hī. Löngöṙô ngam töhet līpöre tö ngòh tarik tö la-evṙen nö nyā ṙòng nup la-enre min anga-aṅ “Pòn inlōnti kahë tö ngam tēv.”—Mumkahten 3:13.
Ötkô Öi Michūḵṙen
“Mikah tuṙen in töre öi lööken elkuilōn, öi hòṅ chiplö i taṙòkhöre.”—HEPRĀI 13:18.
Öt hēngö vanööṙö ön ngòh tö chiplen tarik, kuchik mat nö haṙòh inrē. Pōyen tarik ṙāmatö-ellōnre nö in ò, milēḵṙen inrē tö ò. Aṙē-ěvö pöri ngòh tarik tö michuḵṙen, örheūheu anga-ṅ nö vöö kuö nup tövach la-enre, vöö inrē anga-aṅ töre nö kôti.
Ötkô Öi Yahlölōn Tö Rupīö
“Ui aṅhaṅv-in tö hanāngen tö rupīö, ngāichö ṙôngònglōn tö nup in yīö inlānen.”—HEPRĀI 13:5.
Lōnu in tö rupīö öi kē nup kuilōnre. Ngòh tarik töyāl tö rupīö mahayih kanihngenre anga-aṅ. Yē ò nö örheūheu nö hamūl rupīö, öt ṙētakvö min anga-aṅ nö in yip mikūönöre. Mihòiṅ min nö taṙōl ngam pinīhö tö cha ngaich hēk vahavö min nö kô-òren. (1Timôtī 6:9, 10) Michuḵṙen ön ngòh tarik töyāl tö rupīö. Lökten öp tö akaha tarik nö ngöṙô, “Pōyen inkôlò an min ngòh tökô-en tarik, anga-aṅ pöri tökurāten nö hôṅ kôlò öthō min nö kiröönngöre nö öt sācha.”—Inchōḵ-oṙô 28:20.
Katöllö Öp Tölöng Inkööpö
“Haköp tökô-en mikah inkaha inrē.”—INCHŌḴ-OṘÔ 3:21.
Mihôiṅ in yöölen tö nup haköpre löktö el Iskūl pöi teūngen tö la-enre hēk mihòiṅ ha-aṅ nômö mikūönöre. Mihôiṅ in ṙung öt teūngen tö ṙanāmlōn yěi pôrò pōihölö el Iskūl. Yē hī pöri hôṅ teūngen töp tö kô-en ṙanamlōnre ngaich hôṅ haköp ayī-ö im tēv. Ngö ṙô an ngam Töhet līpöre yip hamangṙô ngam Tēv, “Kôlò min inrē nup töng vahiṙen ò.”—Salmai 1:1-3.
