«Laʼ i chaʼlen tsʌts bʌ yicʼot wem bʌ eʼtel tiʼ cʼʌb i cheʼ bajcheʼ jiñi añʌch chuqui miʼ mejlel i yʌqʼuen jiñi i cʼʌjñibal bʌ i chaʼan» (EFESIOS 4:28).

Jiñi tsaʼ bʌ i meleyonla (pʌtʌyonla) miʼ subeñonla chaʼan wen yom mi laj qʼuel jiñi eʼtel (troñel). ¿Chucoch? Come juntiquil wem bʌ xʼeʼtel miʼ taj chuqui yom i miʼ mejlel i mʌcʼlan i familia, i jiñʌch muʼ bʌ i yʌqʼuen i tijicñʌyel. Cheʼ jaʼel miʼ mejlel i coltan jiñi yom bʌ coltʌntel. Jiñi wem bʌ xʼeʼtelob, wen miʼ qʼuejlelob tiʼ yum ti eʼtel, i tajol cheʼ bajcheʼ jiñi maʼañic miʼ sʌtob i yeʼtel. Jiñi Tsʼijbujel añʌch i sujmlel cheʼ bʌ miʼ yʌl chaʼan muʼ bʌ i tajtʌl ti jiñi eʼtel lac «majtañʌch tilem bʌ ti Dios» (Eclesiastés 3:13).

«Mi lon c wen ñop chaʼan añʌch wem bʌ lon j conciencia, come comʌch lon c mel chuqui utsʼat tiʼ pejtelel chuqui mi lon c mel» (HEBREOS 13:18).

Mi mucʼʌch lac mel chuqui utsʼat, wen mi caj la cubin lac bʌ, an lac ñʌchʼtʌlel yicʼot wen mi caj laj cʼaj la co. Cheʼ jaʼel, jiñi yambʌlob mi caj i qʼueloñobla ti ñuc i mi caj i ñopob ti lac tojlel. Jiñi mach bʌ añic miʼ melob chuqui utsʼat, mach tijicñayic mi caj i yajñelob. Tajol jiñi i conciencia miʼ tech i subeñob chuqui mach bʌ weñic tsiʼ meleyob yicʼot miʼ bʌcʼñañob chaʼan miʼ ñaʼtʌntel chuqui tsaʼ bʌ i meleyob.

«Mach laʼ cʼuxbin taqʼuin, i yom tijicñayetla yicʼot jiñi am bʌ laʼ chaʼan» (HEBREOS 13:5).

Jiñi taqʼuin i cʼʌjñibal chaʼan mi lac mʌn chuqui mi laj cʼux yicʼot yan tac bʌ, pero i cʼuxbintel taqʼuin miʼ mejlel i yʌqʼueñonla cabʌl wocol. Tajol an majqui miʼ mejlel i cʼʌn jiñi i yorajlel am bʌ i chaʼan yicʼot jiñi i pʼʌtʌlel chaʼan miʼ taj cabʌl i chubʌʼan. Pero tiʼ caj jiñi, miʼ mejlel i yʌcʼ ti wocol i ñujpuñel, maʼañix miʼ yʌqʼuen i yorajlel chaʼan miʼ yajñel yicʼot i yalobil o miʼ cʼamʼan (1 Timoteo 6:9, 10). Jiñi muʼ bʌ i wen mulan taqʼuin, miʼ mejlel i cʼotel i mel mach bʌ weñic. Juntiquil wen am bʌ i ñaʼtʌbal tsiʼ yʌlʌ: «Jini toj bʌ mi caj i yutsi taj i wenlel, pero jini muʼ bʌ i bʌcʼ otsan i bʌ ti rico mi caj i toj i mul» (Proverbios 28:20).

«Yom maʼ wen ñaʼtan pañimil. Chʌn ñaʼtan bajcheʼ yom maʼ mel» (PROVERBIOS 3:21).

Jiñi wem bʌ cʌntesʌntel mucʼʌch i coltañonla chaʼan mi lac taj wen tac bʌ lac melbal (chaʼlibal). Pero iliyi mach yomic i yʌl chaʼan tijicña mi caj la cajñel yicʼot chaʼan wen cabʌl lac taqʼuin. Chaʼan wen mi la cajñel, i cʼʌjñibal lac chaʼan jiñi cʌntesʌntel tilem bʌ ti Dios. Jiñi Tsʼijbujel miʼ yʌl chaʼan jiñi muʼ bʌ i ñʌchʼtʌben i tʼan Dios, wen mi caj i loqʼuel pejtelel chuqui miʼ mel (Salmo 1:1-3).