“Yandi sala kisalu ya ngolo, yandi sala kisalu ya mbote ti maboko na yandi, sambu yandi zwa kima ya kupesa muntu yina me konda bima.”—BAEFEZO 4:28.

Muntu yina me salaka beto ke zolaka beto mona nde kisalu kele kima ya mbote. Sambu na nki? Muntu yina ke salaka ngolo ke vandaka na kiese sambu yandi ke lungisaka bampusa na yandi mpi bampusa ya dibuta na yandi. Nkutu, yandi lenda sadisa bantu yina kele na mfunu ya lusadisu. Mfumu na yandi ya kisalu ke bakaka yandi mpi na valere. Yo yina kana muntu ke sala kisalu mbote, mbala mingi bo ke katulaka yandi ve na kisalu. Biblia ke tubaka nde kana muntu me baka mambote sambu yandi me sala ngolo, yo kele “dikabu ya Nzambi.”—Longi 3:13.

“Beto ke tula ntima nde beto kele ti kansansa ya mbote, sambu beto ke zola kuditwadisa na masonga na mambu yonso.”—BAEBREO 13:18.

Kana beto kele masonga, beto ta vanda bantu ya ke kudizitisa, beto ta vanda ti ngemba ya mabanza mpi ta lalaka mpongi ya mbote na mpimpa. Kana beto kele masonga, bantu ya nkaka ta tudilaka beto ntima mpi ta zitisaka beto. Bantu yina me konda masonga ke bakaka ve mambote yai yonso. Yo lenda vanda mpi nde kansansa ke yangisaka bo mpi bo ke zingaka na boma nde kilumbu kele bantu ta zaba mambu ya bo ke sala.

“Zola ya mbongo kuyala ve mutindu na beno ya kuzinga, na ntangu beno ke sepela ti bima yina beto kele na yo.”—BAEBREO 13:5.

Beto ke vandaka ti mfunu ya mbongo sambu na kusumba bima ya kudia mpi bima ya nkaka ya mfunu. Kansi, “zola ya mbongo” kele kibeni mbi. Muntu yina ke zolaka mbongo lenda sadila ntangu mpi ngolo na yandi ya mingi na kusosa kaka mbongo. Muntu ya kele ti nzala ya ngolo ya kukuma ti mbongo mingi, yandi ti kwelani na yandi lenda zinga diaka ve mbote, yandi lenda vanda diaka ve ti ntangu ya kufwana sambu na bana na yandi mpi nkutu yandi lenda bela. (1 Timoteo 6:9, 10) Katula yo, muntu yina ke zolaka mbongo lenda sala mambu ya mbi. Muntu mosi ya mayele tubaka nde: “Muntu ya kwikama ta baka balusakumunu mingi, kansi muntu yina ke sala mambu ntinu-ntinu sambu na kukuma mvwama ta konda ve kusala mbi.”—Bingana 28:20.

“Tanina mayele mpi mayele ya kuyindula.”—BINGANA 3:21.

Kana muntu me longuka mbote na nzo-nkanda, yandi ta kuma muntu ya mbote yina bo lenda tudila ntima mpi kibuti ya mbote. Kansi kana muntu me longuka nzo-nkanda mbote, yo ke tendula ve nde yandi ta bakaka ntangu yonso konso kima yina ya yandi kele na yo mfunu mpi kuvanda na kiese. Sambu na kununga na mambu yonso na luzingu, beto kele na mfunu ya malongi ya Nzambi. Biblia ke tuba nde muntu yina ke widikilaka Nzambi: “Konso kima yina yandi ke sala ta nunga.”—Nkunga 1:1-3.