Qe tbʼanel consej tuʼn qtzalaj tiʼjju at qe
Qa o qo kubʼ mojeʼ moqa naʼmx, qa kuʼxun qoʼ moqa ya o qo tijen, qkyaqilx qaj tuʼn qtzalaj toj qanqʼibʼil. Ex atzun jlu taj Dios tuʼn tkubʼ qnaʼn. Tuʼntzunju, in che tzaj tqʼoʼn tbʼanel consej qe.
Tzʼoka te jun tbʼanel aqʼunal
Bʼaʼn «tuʼn taqʼnan [xjal] tuʼn tqʼabʼ tuʼn tbʼinchante jun aqʼuntl tuj tumelxix, tuʼntzun tknet aju in ajbʼen te, ex tuʼn t-xi tqʼoʼn chʼin teju atx taj te» (EFESIOS 4:28).
Taj Dios tuʼn tten tbʼanel qximbʼetz tiʼj aqʼuntl. ¿Tiquʼn? Tuʼnju qa in nok tilil tuʼn jun xjal tuʼn taqʼunan ex tuʼn kykʼaʼchit toj tja, in nonin jlu tiʼj tuʼn ttzalaj. Ax ikx, jaku tzʼonin kyiʼj qeju atx taj kye. In che tzalaj patrón kyiʼj xjal bʼaʼn che aqʼunan ex tuʼn jlu mintiʼ in nel qʼiʼn kyaqʼun. Tuʼntzunju, in tzaj tqʼamaʼn Tyol Dios qa in nok aqʼuntl te jun oyaj (Eclesiastés 3:13).
Miʼn sbʼuna
«Qʼuql qkʼuʼje tiʼj in qbʼinchaʼne bʼaʼn ik tzaʼnx in tmaʼn qanmiye, qajbʼile tuʼn qbʼinchanteye aju bʼaʼn tuj tkyaqil» (HEBREOS 13:18).
Qa mintiʼ in qo sbʼun, in kubʼ qnaʼn bʼaʼn, in qo tzalaj ex mintiʼ jun tiʼ in bʼaj qkʼuʼj tiʼj aj qxiʼ jtal. Ax ikx, kʼokel qeʼ kykʼuʼj txqantl qiʼj ex kʼokel kyqʼoʼn qoklen. Aqeju xjal in che sbʼun, kyuʼnx in nel kyiʼn ambʼil tuʼn kytzalaj toj kyanqʼibʼil. Jakulo kubʼ kynaʼn nya bʼaʼn ex in che xobʼ tuʼnju jaku tzʼel nikʼbʼaj tiʼjju nya bʼaʼn otoq bʼant kyuʼn.
Tenx t-ximbʼetza toj tumel tiʼj pwaq
«Miʼn pon kykʼuʼje tiʼj pwaq; che tzalaje tiʼj chʼin at kyeye jaʼlo» (HEBREOS 13:5).
Ax tok, at tajbʼen pwaq moqa medi tuʼn tlaqʼet qwa ex junjuntl tiʼchaq qe, pero jaku tzaj tiʼn nya bʼaʼn qiʼj qa ma tzʼok qkʼujlaʼn. Jaku bʼaj tnajsaʼn jun xjal nim ambʼil ex tipumal noq tuʼn tkanet mas tpwaq. Tuʼn jlu, jaku tzaj nya bʼaʼn toj tmejebʼleʼn, mlay ten ambʼil tiʼj tuʼn tten kyukʼil toj tja ex jaku tzaj yabʼil tiʼj (1 Timoteo 6:9, 10). Nya oʼkxju, qa ma tzʼok tkʼujlaʼn jun xjal pwaq, jaku kubʼ tbʼinchaʼn jun tiʼ nya toj tumel ik tzeʼn tuʼn tsbʼun moqa tuʼn telqʼan. Tqʼama jun xjal at tnabʼil jlu: «Aju xjal axix tok yolin, kbʼel kyʼiwlaʼn nimxix; atzunju xjal taj tuʼn tok naj te qʼinun, mlayx tzʼikx tiʼj tuʼn miʼn tkubʼ tcastiw» (Proverbios 28:20).
Jyonktza xnaqʼtzbʼil mas tbʼanel
«Kukx tuʼn tten tnabʼla, ex miʼn kyaj tkolina aju tnabʼla bʼaʼn» (PROVERBIOS 3:21).
In nonin jun tbʼanel xnaqʼtzbʼil qiʼj tuʼn qok te jun tbʼanel xjal ex tuʼn qok te jun tbʼanel mambʼaj. Noqtzun tuʼnj, mlay tzaj tqʼoʼn axix tok tzalajbʼil qe ex mlay tzaj tqʼoʼn qpwaq. ¿Tiʼtzun jaku tzʼonin qiʼj? Oʼkx jaku tzʼonin xnaqʼtzbʼil in tzaj tqʼoʼn Dios qe tuʼntzun qtzalaj toj tkyaqil tten qanqʼibʼil. In tzaj tqʼamaʼn Biblia qa tbʼanel in nela tkyaqil toj kyanqʼibʼil xjal in xi kybʼiʼn Dios (Salmo 1:1-3).
Bʼalo ax ikx tgana jlu
AJU XQʼUQIL
¿Tiʼ kbʼantel quʼn tuʼn qtzalaj tiʼj aqʼuntl kyuw?
Xnaqʼtzana tiʼj onbʼil in tzaj tqʼoʼn Tyol Dios tuʼntzun tkanet tzalajbʼil tuʼna toj aqʼuntl.
