“Moneki xitekitikaj. Moneki xijchiuakaj tlamantli tlen kuali ika inmoma para inkipiasej tlen ika inpanosej uan para nojkia uelis inkinpaleuisej sekinok” (EFESIOS 4:28).

ToTeotsij techmachtia kuali ma tikitakaj toteki. ¿Kenke kiampa techiljuia? Pampa se katli kuali tekiti kitlani tlen ika kinpanoltis ichampoyouaj uan nojkia ueli kinpaleuia sekinok, uan nopa kichiua ma yolpaki. Katli tlayakanaj ipan se tekitl tlauel kinpatiitaj katli kuali tekitij uan yeka uelis kintekimakasej miak xiuitl nopaya. Biblia xitlauak kiijtoua nopa kuali tlamantli tlen tijseliaj kema chikauak titekitij, eli “keja se regalo tlen toTeko techmakatok” (Eclesiastés 3:13).

“Tijmatij ipan toyolo para tinemij xitlauak iixpa uan keja nopa tijnekiskiaj tijchiuasej nochipa” (HEBREOS 13:18).

Tlaj amo titlachtekij, kuali tijyolmatisej, tiitstosej ika tlaseuilistli uan kuali tikochisej. Nojkia, sekinok techtlepanitasej uan motemachisej ipan tojuantij. Maseualmej katli tlachtekij amo kuali kiyolmatij pampa kinyolkokoua inintlalnamikilis uan nochipa moiljuijtokej se tonali kinpantisej.

“Amo xikixtokakaj inkipiasej miak tomij. Más kuali xipakikaj ika tlen inkipiaj” (HEBREOS 13:5).

Maske uelis tijkouasej tlen ika timopanoltisej uan sekinok tlamantli ika tomij, tlaj tlauel tijpatiitaj kichiuas amo kuali ma tiitstokaj. Se akajya katli kineki kipias miak tlamantli kitekiuia miak tonali uan ichikaualis, yeka uelis ayokmo kuali itstos iuaya inamik, ayokmo itstos ininuaya ikoneuaj uan uelis mokokos (1 Timoteo 6:9, 10). Uan teipa, nojkia kinekis tlachtekis. Se tlakatl katli tlalnamiki kiijtok: “Se tlakatl tlen itstok temachtli kiselis miak tlateochiualistli, pero aki kineki moricojchiuas ika se tlalochtli moualikilis tlaouijkayotl” (Proverbios 28:20).

“Xijtlakakili ni tlalnamijkatlajtoli, axkema xikinilkaua” (PROVERBIOS 3:21).

Kema timomachtiaj ipan escuela, technextiliaj kuali ma timonejnemiltikaj uan kuali ma tikinyakanakaj tochampoyouaj. Maske tlauel timomachtisej, amo nochipa techpaleuis ma tiyolpakikaj uan ma tijpiakaj tlen ika timopanoltisej. Tlaj tijnekij kuali tiitstosej, moneki tijkauasej toTeotsij ma techmachti. Biblia kiijtoua katli kitlakakilia toTeotsij, ya kiyakanas ipan se tekitl uan kuali kisas (Salmo 1:1-3).