Etyi Tyitukuatesako Okuhambukilwa Ovipuka Tuna
Onthue atuho, tyilinge tuanepa ine katuanepele, tuvakuendye ine tuakulupa, tuhanda okukala nehambu nokuhambukilwa ovipuka tuna. Omutungi wetu nae otyo etuhandela, otyo etuavelela onondongwa ononyingi mbutukuatesako.
Undapa Nombili
“Aundape unene, okulinga ovilinga vikahi nawa nomankhanya ae, opo akale natyimwe pala okutepaulila-ko una wesuka.” — OVA EFESU 4:28.
Omutungi wetu uhanda tusuke novilinga vietu. Omokonda yatyi? Omokonda omunthu uundapa nombili ukala nehambu mokonda utyii okuti ovilinga viae vimukuatesako okulitekula nokutekula ombunga yae. Tupu upondola okukuatesako una, una etyi esukisa. Ou aundapela memupande unene, iya mokonda uundapa nawa upondola okuhapolwa movilinga. Ombimbiliya ipopia okuti, okuyamba mokonda yovilinga tulinga “otyiawa tya Huku.” — Eclesiastes 3:13.
Kala Omukuatyili
“Tuna onthumbi yokuti tuna omutima wasukuka mokonda tuhanda okukala ovakuatyili movipuka aviho.” — OVA HEBELEU 13:18.
Inkha tukala ovakuatyili, matulitehelela nawa, matukala nehambu, atulala olumphoki lukahi nawa. Vakuetu mavetuyumbu onthumbi nokutulinga onthilo. Ovanthu vehevakuatyili vetupu ovipuka ovio. Tupu velivela vala onombei, nokuna owoma wokuti vakuavo mavevehupula vavaka.
Wahatale Onombongo Ngatyina Otyipuka Tyesukisa Vali
“Muhakalei nohole nonombongo mahi hambukilwe ovipuka muna-vio pehepano.” — OVA HEBELEU 13:5.
Tuesukisa onombongo opo tulande okulia novipuka ovikuavo vali. Mahi okukala “nohole nonombongo” otyitateka. Omunthu wokuhole onombongo umanena vala omuvo wae nononkhono mokuovola okuyawisa konombongo mbae. Mokonda yokuovola vala onombongo upondola okunyona otyinepo tyae, ahakala nomuvo wokulongesa ovana vae, atee umwe upondola okuvela. (1 Timotiu 6:9, 10) Tupu wokuhole onombongo upondola okuhakala omukuatyili. Omulume umwe wapopile okuti: “Omulume omukuatyili uyambwa unene, mahi una upinayala nokumona omalumono, kamakala tyihavelwa onombei.” — Provérbios 28:20.
Koya Ondongeso Ikahi Vali Nawa
“Yunga vali nawa enoñgonoko liove nonondunge mbove.” — PROVÉRBIOS 3:21.
Okulongeswa tyipondola okukuatesako okukala omunthu ukahi nawa, na he ukahi nawa. Mahi etyi tulongeswa monosikola, katyitukuatesako okukala nehambu nokulinga nawa ovipuka aviho tuhanda. Opo tuendeke nawa ovipuka aviho momuenyo wetu tuesukisa okulongeswa na Huku. Ombimbiliya ipopia okuti omunthu wokutehelela Huku: “Ovipuka aviho alinga maviende nawa.” — Salmo 1:1-3.
Hamwe Noove Uhanda
OMUTALA WOMULAVI
Hambukilwa Ovilinga Viove
Tala oñgeni Ombimbiliya ipondola okukukuatesako okukala nehambu movilinga viove.
