Olketa Key for Hapi and Satisfae
Iumi evriwan nomata iu singol or marit, young or olo, iumi laek for hapi and satisfae. Creator blo iumi tu laekem iumi for feel olsem. So hem givim iumi nambawan advaes.
Waka Hard
“Hem mas garem waka . . . mekem hem savve helpem narawan wea needim samting.”—EPHESUS 4:28.
Creator blo iumi encouragem iumi for garem positive tingting abaotem waka. Why? Man wea waka hard bae hem hapi bikos hem fit for provaed for hemseleva and famili blo hem. Maet hem savve provaed tu for olketa wea garem need. Boss blo hem tu bae tinghae lo hem. Staka taem wanfala gudfala wakaman bae no sack from waka blo hem. Bible sei olketa wea waka hard bae hapi. —Eklesiastes 3:13.
Mas Honest
“Mifala sure mifala garem gudfala konsens, and mifala laek for honest long evri samting wea mifala duim.”—HEBREW 13:18.
Sapos iumi honest, pipol bae respectim iumi and bae iumi garem peace lo mind and sleep gud lo naet. And tu, olketa narawan bae trustim and respectim iumi. Pipol wea no honest bae no kasem eni gud samting. And tu, konsens blo olketa gohed for pokem olketa, and olketa maet stap witim fraet nogud wanday bae olketa faendaot dat olketa no honest.
Garem Balance Tingting Abaotem Selen
“Iufala mas no laekem tumas selen, bat iufala mas hapi nomoa long samting wea iufala garem.”—HEBREW 13:5.
Iumi needim selen for kaikai and olketa nara samting wea iumi needim. Bat, “wei for laekem tumas selen” hem dangerous tumas. Hem savve mekem man for iusim staka taem and strong blo hem for kasem staka selen moa. Diskaen wei for aftarem tumas selen savve affectim marit blo hem, stealim taem wea hem shud spendem witim olketa pikinini blo hem, and hem savve spoelem health blo hem tu. (1 Timothy 6:9, 10) And tu, samwan wea laekem tumas selen savve kasem temptation for duim samting wea no honest. Wanfala wise man sei: “Man yu save trastem, bae hemi hapi fogud. Bat man faetem dola nomoa, bae hemi panis.”—Provebs 28:20.
Chusim Best Education
“[Kipim] waes blong yu, an kipim gudfala tingting.”—PROVEBS 3:21.
Gudfala education savve helpem iumi for kamap olketa responsible adult and parents. Bat wei for kasem education hem no minim bae iu stap sef and hapi nao. For barava win lo evri samting lo laef, iumi needim education wea God givim. Bible sei olsem abaotem man wea lisin lo God: ‘Evrisamting wea hem gohed fo duim kamap gudfala.’—Sams 1:1-3.
Iu Laek Lukim Nara Samting?
WEKAP!
Hao Iumi Savve Hapi—Wei for Satisfae and Givim Samting
Staka pipol tingse man wea rich and garem staka samting hem hapi and garem gudfala laef. Bat waswe, selen and olketa samting wea man garem savve mekem hem hapi?
