“E rave ra i te angaanga, kia rauka iaia te mea meitaki i tona uaorai rima, kia puapingaia tana kia oronga atu na te tangata i ngere.”​—EPHESIA 4:28.

Akamaroiroi mai Tei Anga ia tatou kia akatupu i te manako meitaki no te angaanga. No teaa ra? Ka mataora te tangata angaanga pakari no te mea ka rauka iaia i te akono iaia uaorai e tona ngutuare tangata. Penei ka rauka katoa iaia i te tauturu i tetai tei ngere. Pera katoa, ka mareka tona pu angaanga iaia. No reira e mea papu kare te tangata angaanga meitaki e akanooia mei tana angaanga. Te tumu teia i akataka ai te irava i te tutaki no te angaanga pakari e “e mea o maiia mai ïa e te Atua.”​—Koheleta 3:13.

“Kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.”​—EBERA 13:18.

Me rave tatou i te tika, ka rauka ia tatou te tu ngateitei, te ngakau ‘au e ka moe meitaki i te po. Pera katoa, ka irinaki e ka akangateitei mai tetai ke ia tatou. Te aronga tei rave i te mea tika kore, ka ngere ratou i teia au meitaki. Pera katoa, ka tamanata to ratou akava ngakau ia ratou e ka mataku e a tetai rā, ka kitenaia mai to ratou tu tika kore.

“Ei noo anga noinoi kore i te apinga to kotou; kia mareka i ta kotou i rauka.”​—EBERA 13:5.

Ka anoanoia te moni ei oko i te kai e te au apinga tei anoanoia. Inara, e mea kino tikai “te anoano maata oki i te moni.” Ka akakeu te reira i tetai tangata kia akapou i tona taime e te maroiroi ei akaputu i te moni. Penei no tana tauta anga kia rauka te moni, ka manamanata tona oraanga akaipoipo, kare ona taime ki tana tamariki e penei ka tu aia i te maki. (1 Timoteo 6:9, 10) Tei maata atu, penei ka timataia te tangata tei inangaro maata i te moni kia rave i te mea tika kore. Karanga tetai tangata kite pakari: “Ko te tangata pikikaa kore ra, te maata ra tona meitaki; ko tei rapurapu ra i te akaputu i te apinga kia maata, kare e kore te ara.”​—Maseli 28:20.

“E tāpu koe i te pakari meitaki e te akono.”​—MASELI 3:21.

Ka tauturu te apii meitaki ia tatou kia riro mai ei aronga meitaki e ei metua tukatau. Inara kare te apii teitei e akapapu mai e ka rauka te turanga tinamou e te mataora. Kia puapinga tatou i roto i te au tuanga pouroa o te oraanga, ka anoanoia te apii no ko mai i te Atua. Te karanga ra te irava no te tangata tei akarongo ki te Atua: “Ko tana katoa e rave ra, te meitaki ra ïa.”​—Salamo 1:1-3.