Lege ti duti na ngia na ye so mo yeke na ni
E kue, atâa e yeke kumbamba wala e sara mariage awe, maseka wala mbakoro, e ye ti duti na ngia na ye so e yeke na ni. A yeke ye so Nzapa aye nga la, tongaso lo mû na e anzoni wango.
Sara kua ngangu
“Zia lo sara kua ngangu, lo sara nzoni kua na maboko ti lo wani tongaso si lo wara mbeni ye ti kangbi na zo so ayeke na bezoin ni.”—A-ÉPHÉSIEN 4:28.
Wasarango e a-encouragé e ti duti na nzoni bango ndo na ndö ti kua. Ngbanga ti nyen? Ngbanga ti so mbeni zo so asara kua ngangu apeut ti wara ye so lo nga na asewa ti lo ayeke na bezoin ni, na a sara si lo yeke na ngia. Lo peut même ti aidé mbeni zo so ayeke na yâ ti mbeni bezoin. Patron ti lo nga ayeke bâ lo na nene ni. Tongaso, mingi ni zo so asara kua ngangu la a yeke bata lo na kua ti lo. A yeke na lege ni so Bible afa nzoni ye ti peko ti ngangu kua tongana mbeni “matabisi so Nzapa amû na zo.”—Zo-ti-fa-tene 3:13.
Sara ye na lege ni
“E hinga e tene e yeke na nzoni conscience, ngbanga ti so e ye ti sara ye mbilimbili na yâ ti aye kue.”—AHÉBREU 13:18.
Tongana e sara ye na lege ni, e yeke ne terê ti e, e yeke na siriri ti bê, nga e yeke lango nzoni. Na ndö ni, azo ayeke sara confiance na e nga ala yeke ne e. Azo so asara ye na lege ni ape ayeke wara anzoni ye so ape. Nga, conscience ti ala ayeke fâ ngbanga na ndö ti ala lakue, na ala yeke sara mbeto so azo ayeke hinga ande ye so ala sara.
Duti na nzoni bango ndo na ndö ti nginza
“Ala zia si ndoye ti nginza aduti na yâ ti sarango ye ti ala pëpe, me ala zia bê ti ala gï na ndö ti aye so ala yeke na ni.”—AHÉBREU 13:5.
E bezoin nginza ti vo na kobe nga na ambeni ye. Me, “ndoye ti nginza” ayeke sioni mingi. Mbeni zo so aye nginza apeut ti mû ngoi ti lo nga na ngangu ti lo ti gi na gbâ ti nginza. Gingo nginza tongaso apeut ti buba mariage ti lo, amû temps ti dutingo na terê ti amolenge ti lo nga même ti buba seni ti lo (1 Timothée 6:9, 10). Nga, mbeni zo so aye nginza mingi apeut ti sara ye so ayeke na lege ni ape. Bible atene: “Zo so ayeke be-ta-zo ayeke wara gbâ ti aye ti nzoni, me zo so adö terê ti wara gbâ ti mosoro, tënë ayeke duti ande na li ti lo.”—aProverbe 28:20.
Soro nzoni fango lege
“Bata ndara ti sara ye ti nzoni, nga kode so mo yeke na ni ti gbu li nzoni.”—APROVERBE 3:21.
Nzoni fango lege ayeke aidé e ti ga zo ti confiance nga ti duti nzoni babâ wala mama. Me, nzoni mandango mbeti apeut ape ti sara si e duti nzoni lakue wala e duti na ngia. Ti tene ye kue so e sara aga nzoni, e bezoin fango lege ti Nzapa. Bible afa so zo so amä Nzapa, “ye kue so lo sara ayeke ga nzoni.”—Psaume 1:1-3.
Bâ nga
TOUR TI BA NDO
Ye so mo lingbi ti sara ti wara ngia na yâ ti akua ti maboko
Bâ ambeni wango so Bible amû na ndo ti ye so mo lingbi ti sara ti wara ngia na yâ ti kua ti mo.
ZINGO NA LANGO!
Lege ti duti na ngia: Zia bê gï na ndö ti ye so mo yeke na ni nga mû ye na azo
Gbâ ti azo atene so ti wara ngia nga ti réussir a lingbi zo aduti na gbâ ti mosoro si. Me eskê mosoro la ayeke sara si zo aduti na ngia lakue? Aye so asi afa nyen na e?
