Xave atu moris kontente
Maski kaben-naʼin ka klosan, foin-saʼe ka idade ona, ita hotu hakarak moris kontente. Ita-nia Kriadór mós hakarak ita atu sente hanesan neʼe. Tan neʼe, nia fó mai ita matadalan neʼebé diʼak liu.
Serbisu ho badinas
“Nia tenke halo serbisu neʼebé diʼak ho ninia liman, atu nuneʼe nia iha buat ruma atu fahe ba ema neʼebé presiza.”—ÉFESO 4:28.
Ita-nia Kriadór anima ita atu iha hanoin pozitivu kona-ba serbisu. Tanbasá? Ema neʼebé serbisu ho badinas bele moris kontente tanba nia bele tau matan ba ninia an no mós ninia família. Nia mós bele ajuda ema seluk neʼebé presiza. Ninia patraun sei hafolin tebes nia. Dala barak, serbisu-naʼin neʼebé diʼak sei la lakon serbisu. Bíblia hatete ho klaru katak kolen husi serbisu makaʼas mak “prezente husi Maromak”.—Eclesiastes 3:13.
Hatudu laran-moos
“Ami fiar katak ami-nia konxiénsia moos, no ami hakarak atu hatudu laran-moos iha buat hotu.”—EBREU 13:18.
Se ita mak ema neʼebé laran-moos, ita sei iha dignidade, sente laran-hakmatek, no bele toba-dukur iha kalan. No mós, ema seluk bele tau fiar no respeitu ita. Ema neʼebé la hatudu laran-moos, sira labele hetan benefísiu sira-neʼe. No mós, sira-nia konxiénsia fó-sala ba sira no sira-nia moris sempre ho taʼuk tanba loron ida ema seluk sei kaer toman sira tanba sira la hatudu laran-moos.
Keta husik osan sai buat neʼebé importante liu iha moris
“Iha imi-nia moris, keta hadomi osan, maibé kontente ho buat neʼebé imi iha ona.”—EBREU 13:5.
Ita presiza osan atu sosa hahán no mós buat seluk. Maski nuneʼe, “hadomi osan” mak perigu tebes. Ema neʼebé hadomi osan bele uza nia tempu no enerjia hotu atu manán osan barak liután. Neʼe bele lori perigu ba ninia moris kaben nian, la iha tempu ba oan sira, no mós bele estraga ninia saúde. (1 Timóteo 6:9, 10) No ema neʼebé hadomi osan bele hetan tentasaun atu la hatudu laran-moos. Mane matenek ida dehan: “Ema neʼebé laran-metin sei simu bensaun barak, maibé ema neʼebé ansi atu sai riku sei halo sala.”—Provérbios 28:20.
Hili edukasaun neʼebé diʼak liu
“Proteje matenek no kbiit atu hanoin.”—PROVÉRBIOS 3:21.
Edukasaun neʼebé diʼak ajuda ita atu kaer responsabilidade, no sai inan-aman neʼebé diʼak. Maibé edukasaun diʼak husi mundu neʼe la fó garantia katak ita sei iha buat hotu no moris kontente. Se ita hakarak hetan susesu iha buat hotu, ita presiza simu edukasaun husi Maromak. Bíblia hatete katak ema neʼebé rona ba Maromak “sei hetan susesu iha buat hotu neʼebé nia halo”.—Salmo 1:1-3.
Karik Ita sei gosta
MATAN-MORIS BÁ!
Ita okupadu demais ka lae?
Ema barak sente susar atu fahe didiʼak sira-nia tempu ba serbisu no mós ba família. Tanbasá sira hasoru susar neʼe? Oinsá mak ita bele fahe didiʼak ita-nia tempu?
MATAN-MORIS BÁ!
Oinsá atu bele moris kontente—Kontente ho buat neʼebé ita iha no hatudu laran-luak
Ema barak fiar katak sasán no rikusoin mak halo ema kontente. Maibé ita bele hetan kontente neʼebé loos husi osan no rikusoin ka lae? Evidénsia ohin loron hatudu saida?
