Ndlela Yo Va Ni Ntsako Ni Ku Eneriseka
Hinkwerhu ka hina, hambi a hi nghenelanga vukati kumbe hi byi nghenerile, hi vantshwa kumbe hi vanhu lavakulu, hi lava ku tsaka ni ku eneriseka. Muvumbi wa hina na yena u lava hi titwa tano, kutani u hi nyike switsundzuxo leswinene.
Tirha Hi Matimba
“A a tirhe hi matimba a endla ntirho lowunene hi mavoko yakwe, leswaku a kuma xo pambulela loyi a pfumalaka.” —VAEFESA 4:28.
Muvumbi wa hina u lava hi teka ntirho tanihi nchumu lowunene. Hikwalahokayini? Munhu loyi a tirhaka hi matimba wa tsaka hikuva u kota ku tiwundla a tlhela a wundla ni ndyangu wakwe. A nga tlhela a kota ku pfuna lava lavaka mpfuno. A nga tsakeriwa ni hi muthori wakwe. Mutirhi lonene a nga endla leswaku a nga heleriwi hi ntirho. Matsalwa ma hlamusela mbuyelo lowunene wa ku tirha hi matimba tanihi “nyiko leyi humaka eka Xikwembu.”—Eklesiasta 3:13.
Tshembeka
“Hi ni ripfalo ro tshembeka, hileswi hi navelaka ku tikhoma hi ku tshembeka eka swilo hinkwaswo.”—VAHEVERU 13:18.
Loko hi tshembeka, ha tixixima, a hi vileli ngopfu naswona hi etlela bya n’wantenyana. Ku engetela kwalaho, van’wana va ta hi tshemba va tlhela va hi xixima. Vanhu lava nga tshembekiki va titsona swilo swoleswo leswinene. Nakambe, va nga tshamela ku titwa nandzu va tlhela va chava leswaku siku rin’wana van’wana va ta vona leswi va swi endlaka.
U Nga Rhandzi Mali
“Mi nga rhandzi mali, kambe enerisekani hi swilo leswi mi nga na swona.”—VAHEVERU 13:5.
Ha yi lava mali leswaku hi xava swakudya ni swilo swin’wana. Hambiswiritano, ku ‘rhandza mali’ swi ni khombo swinene. Swi nga endla munhu a tirhisa nkarhi wakwe wo tala ni matimba leswaku a ta kuma mali yo tala. Ku rhandza mali hi ndlela yoleyo swi nga endla leswaku swilo swi nga n’wi fambeli kahle evukatini, swi endla a nga vi na nkarhi lowu eneleke wo va ni vana vakwe naswona a nga ha vabya. (1 Timotiya 6:9, 10) Nakambe, munhu loyi a rhandzaka mali a nga ha ringeka ku nga tshembeki. Wanuna wo tlhariha u te: “Munhu wo tshembeka u ta kuma mikateko yo tala, kambe la hatliselaka ku kuma rifuwo a nge tshami a nga ri na nandzu.”—Swivuriso 28:20.
Hlawula Dyondzo Leyinene
“Hlayisa vutlhari ni vuswikoti byo ehleketa.”—SWIVURISO 3:21.
Dyondzo leyinene yi hi pfuna ku va vanhu vo tshembeka hi tlhela hi va vatswari lavanene. Kambe dyondzo leyi tlakukeke a yi nge swi koti ku endla leswaku mikarhi hinkwayo hi kuma leswi hi swi lavaka hi tlhela hi tsaka. Loko hi lava leswaku swi hi fambela kahle eka hinkwaswo leswi hi swi endlaka, hi lava dyondzo leyi humaka eka Xikwembu. Matsalwa ma vula leswi hi munhu loyi a yingisaka Xikwembu: “Hinkwaswo leswi a swi endlaka swi ta humelela.”—Pisalema 1:1-3.
U Nga Ha Tsakela
XIHONDZO XO RINDZA
Ndlela Yo Tsakela Ku Tirha Hi Matimba
Xiya nkongomiso wa Bibele malunghana ni ku kuma ntsako ni ku eneriseka entirhweni wa wena.
XALAMUKA!
Xana U Khomeke Ngopfu?
Vanhu vo tala swa va tikela ku endla mitirho ya ku tihanyisa ni ku tlhela va hetisisisa vutihlamuleri bya le kaya. I yini lexi endlaka swi tika? Va nga endla yini?
XALAMUKA!
Ndlela Yo Kuma Ntsako—Enerisaka Hileswi U Nga Na Swona U Tlhela U Hanana
Vo tala va ehleketa leswaku munhu u kuma ntsako hiloko a fumile. Xana rifuwo ri endla leswaku munhu a tsaka? Xana vukambisisi byi vula yini?
XALAMUKA!
Tindlela Ta Ku Va Ni Vutomi Lebyi Tsakisaka
Xana vutlhari bya le Bibeleni byi nga ku pfuna leswaku u va ni vutomi lebyi tsakisaka? Nhloko-mhaka leyi yi tlhuvutsa milawu ya mune ya Bibele leyi pfunaka hakunene.
