Tseʼeluk koʼtantik sok te bin ay kuʼuntik
Chikan teme nujpunemotikix o maʼuk, teme achʼix keremotik o ayix kaʼbilaltik, ya jkʼantik te ayuk stseʼelil koʼtantik. Te Jpaswanej kuʼuntik ya skʼan te jichuk ya kaʼiy jbatik-euk, jaʼ yuʼun yakʼbeyojotik lekil consejoetik.
Lekil j-aʼtelukat
«Acʼa aʼtejuc, acʼa spas ta scʼab te bin lec ta pasel, scuenta yuʼun hich ya sta a te bin ya yaʼbe te machʼa mayuc bin ay yuʼune» (EFESIOS 4:28).
Te Jpaswanej kuʼuntik ya stij koʼtantik yuʼun lekuk ya kiltik te aʼtelil. ¿Binwan yuʼun? Melel te machʼa ya x-aʼtej ta lek jich ya xjuʼ ya smakʼlin te sfamilia sok ya x-akʼbot stseʼelil yoʼtan. Jaʼnix jich ya xjuʼ ya skoltay te machʼa ya xtuun yuʼune. Te patronetik jaʼ ya skʼanik te machʼatik ya x-aʼtejik ta lek, jaʼ yuʼun maniwan xnutsot lokʼel ta yaʼtelik. Te Biblia ya yal te machʼa tulan ya x-aʼtej «ha mahtanil yuʼun Dios» (Eclesiastés 3:13).
Lekuk te bin ya apas
«Jnaʼojcotic te mayuc bin ya yalbotic te coʼtancotic, yuʼun ya jcʼancotic te lec spisil bintic ya jpascotique» (HEBREOS 13:18).
Teme lek te bin ya jpastike, leknax te bin ya yal te koʼtantik, ay lamalkʼinal sok leknax ya xwayotik. Jaʼnix jich ya yakʼ smukʼul yoʼtanik ta jtojoltik te yantike. Te machʼatik ma jichuk ya spasike, maʼyuk stseʼelil yoʼtanik, melel yaniwan x-albot yuʼun te yoʼtanik te ay bin ma lek yakik ta spasel sok ya xiʼik te ay machʼa ya snaʼ stojol te bin yakik ta spasele.
Mame jaʼuk ya xbajt awoʼtanik ta sleel te takʼin
«Ma me xbaht ta awoʼtanic sbicʼsitayel taqʼuin, junuc me awoʼtanic yuʼun te bin ay awuʼunic» (HEBREOS 13:5).
Ya xtuun kuʼuntik te takʼin ta smanel jweʼeltik o yantikxan biluketik, pero te machʼa ya sbikʼsitay te takʼin ya xjuʼ ya x-utsʼinwan. Te machʼa jaʼnax baem ta yoʼtan sleel bayal sbiluk ya xjuʼ te maʼyukix stseʼelil yoʼtan ta sfamilia, te ma xyakʼbeyix tiempo te yal snichʼnab sok ya xjuʼ ya stsakot ta chamel yuʼun (1 Timoteo 6:9, 10). Jaʼnix jich te machʼa kʼux ta yoʼtan te takʼin ya xjuʼ te ay bin ma lek ya spas. Jtul pʼijil winik jich la yal: «Te machʼa jun yoʼtan ya me yichʼ bayel bendición, yan te machʼa ora nax ya scʼan ya xcʼulejub ya me yichʼ castigo» (Proverbios 28:20).
Jaʼ xa atsa te lekil nojptesel
«Canantaya te pʼijil-oʼtanil soc te stsahtayel» (PROVERBIOS 3:21).
Te lekil nojptesel ya skoltayotik yuʼun lekil ants winikotik ya xkʼotik sok lekil meʼil tatilotik. Pero te nojptesel ini maba ya yal te ya jtatik stseʼelil koʼtantik o te ya jta jtakʼintik yuʼun. Yuʼun lek ya xbajt-a te jkuxineltik, jaʼ ya skʼan ya kichʼtik te nojptesel te ya yakʼbotik te Dios. Te Biblia ya yal te machʼa ya schʼam yaʼiy te bin ya yal te Dios, lek ya xlokʼ spisil te bin ya spase (Salmo 1:1-3).
