Tojobtasel sventa xijmuyubaj yuʼun li kʼusi oy kuʼuntike
Mu ventauk mi nupunemutik o mi muʼyuk, mi kerem tsebutik o mi oy xa jabilaltik, ta jkʼantik ti junuk koʼonton kuxulutike, jaʼ jech oy ta yoʼonton li Jpasvanej kuʼuntik eke. Jaʼ yuʼun, yakʼojbutik lekil tojobtaseletik.
Baxbolukot ta abtel
«Tsots abtejuk, akʼo spas lekil abtelal ta skʼob sventa oyuk kʼusi xakʼbe jutebuk li buchʼu oy kʼusi chtun yuʼune» (EFESIOS 4:28).
Li Jpasvanej kuʼuntike tstij koʼontontik ti lekuk xkiltik li abtelale. ¿Kʼu yuʼun?, yuʼun li jun krixchano ti baxbol ta abtele snaʼ kʼuxi tsta li kʼusi chtun yuʼune xchiʼuk tsmakʼlin li yutsʼ yalale, mi jech la spase, xmuyubaj noʼox xchiʼuk xuʼ skolta li buchʼu chtun yuʼun koltaele. Li yajval abtelaletike ep sbalil chil li jun krixchano ti lek xtojob ta abtele. Jech xtok, li j-abtele xuʼ van muʼyuk chchʼay li yabtele, xi onoʼox chalbe skʼoplal Vivlia li kʼusi ta jtatik kʼalal tsots chij-abtejutike: «Jaʼ jun matanal yuʼun Dios» (Eklesiastes 3:13).
Meleluk xakʼopoj
«Jpatoj koʼontonkutik ti sak jol koʼontonkutike, yuʼun oy ta koʼontonkutik ti sakuk jtalelalkutik [o meleluk xikʼopojkutik] ta skotole» (EBREOS 13:18).
Mi melel jnaʼ xijkʼopoje, lek noʼox oyutik, jun noʼox koʼontontik xchiʼuk mas lek chijvayutik. Jech xtok, ta xichʼutik ta mukʼ li yantike xchiʼuk tspat yoʼonton ta jtojolaltik. Yan li buchʼutik mu meleluk chkʼopojike muʼyuk tskʼupinik li kʼusi laj xa kaltik tale. Xuʼ van te xa noʼox xvulvun sjol yoʼontonik xchiʼuk xiʼemik mi x-ilatik o xichʼik aʼiel.
Mu me xbat ta avoʼonton saʼel li takʼine
«Maʼukuk me batem ta avoʼontonik skʼanel takʼin ti kʼu yelan kuxuloxuke, muyubajanik noʼox me ta skoj ti kʼusi oy avuʼunik avie» (EBREOS 13:5).
Jtunel tajek kuʼuntik li takʼine, yuʼun jaʼ sventa jman-o jveʼeltik xchiʼuk yan kʼusitik, pe mi jaʼ bat ta koʼontontik skʼanel li takʼine, xuʼ me xkil-o jvokoltik. Li jun krixchanoe xuʼ van jaʼ xa mas chchʼakbe yorail ta saʼel li kʼusitik x-ayan ta balumile. Mi jaʼ batem tajek ta yoʼonton saʼel li kʼusitik taje, xuʼ me xakʼ ta vokol li snupunele, muʼyuk xa mas chchʼakbe yorail li yalab xnichʼnabike xchiʼuk xuʼ x-ipaj-o (1 Timoteo 6:9, 10). Jech xtok, mi jaʼ batem ta yoʼonton skʼanel li takʼine, xuʼ me x-ayan ta yoʼonton spasel li kʼusi muʼyuk leke. Xi laj yal jun pʼijil vinike: «Li jun tukʼil vinike tsta epal bendision, yan li buchʼu anil tskʼan tspas ta jkʼuleje ta onoʼox spas smul» (Proverbios 28:20).
Saʼo li lekil chanubtasele
«Chabio li pʼijilale xchiʼuk ti xatojob snopele» (PROVERBIOS 3:21).
Li sbalil ta jtatik kʼalal chkichʼtik jtosuk chanubtasele jaʼ sventa xijkʼot ta lekil totil meʼil xchiʼuk ti jpastik li kʼusi jbainojtike. Pe taje maʼuk chakʼbutik li batsʼi mero kuxetel oʼontonale mi jaʼuk chakʼbutik li kʼusi chtun kuʼuntike. Sventa lek xbat li jkuxlejaltike chtun kuʼuntik li chanubtaseletik yuʼun Diose. Li ta Vivliae chal ti buchʼu chchikinta li kʼusi chal Diose lek chkʼot ta pasel yuʼun skotol li kʼusi tspase (Salmo 1:1-3).
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
¿Kʼuxi xuʼ jkʼupintik li tsatsal abtelale?
Saʼo tojobtaseletik ta Vivlia ti chkoltavan sventa jkʼupintik li kabteltike.
