Ajahan ané Ngemaang Harapan
Tuhan sube mejanji yén buin kesep gati kehidupan di guminé lakar ubahe dadi luung. Keluarge-keluarge manuse di guminé lakar idup bagia krane kesengsaraan sube tusing ade. (Kidung 37:11) Kenape iraga bise percaye tekén janjiné ento? Krane ”Tuhan tusingje care manuse ané bise melog-melog”. (Cacah Jiwa 23:19) Jani kenehang ape dogén ané lakar ubahe tekén Sang Pencipta.
Tuhan Lakar Ngilangang Anaké ané Jaat
”Yén anaké jaat tumbuh care padang lan penjahaté ngeliunang, ento mekejang lakar musnah seterusné.”—Kidung 92:7.
Care ané sube kesebutang busan, unduk ané jaat ngeliunang. Iraga tusing perlu heran krane ento mekejang sube keramalang di Cakepan Suci. Di 2 Timotius 3: 1-5 ditu orahange manusané lakar metambah jaat di ”jaman akhir”. Akhir uli ape? Akhir uli anaké ané tusing taat tekén Tuhan. Tusing buin mekelo, Tuhan lakar ngilangang anaké ané jaat ané sing nyak berubah. Sube kéto, anaké ané jemet—ané nyak taat tekén Tuhan, ia tetep lakar ade. ”Anaké ané beneh lakar ngelahang gumi, ditu ia lakar idup seterusné.”—Kidung 37:29.
Tuhan Lakar Ngemusnahang Setan
”Tuhan ané ngemaang kedamaian lakar ngemusnahang Setan.”—ROMA 16:20.
Yén Setan, hantu-hantu, lan mekejang anaké jaat sube musnahange, guminé lakar damai. Sang Pencipta sube mejanji, ”Tusing ade buin ané ngeranaang iraga takut.”—Nabi Mika 4:4.
Tuhan Lakar Ngilangang Penyakit lan Kematian
”Kemah Tuhan ade di tengah-tengah manusané . . . Ida lakar ngusap yéh peningalan anaké mekejang. Tusing ade buin kematian, rase sebet, anak ngeling lan rase sakit.”—WAHYU 21:3, 4.
Kesengsaraan lan penyakit lakar ilang, krane Tuhan lakar menahin mekejang ané usakange olih Setan, Adam, Hawa, lan kesalahaan iraga pedidi. Dadiné,”tusing ade buin kematian”. Anaké ané sayang lan taat tekén Sang Pencipta lakar terus idup. Dije ipun lakar idup?
Sang Pencipta Lakar Ngubah Guminé Dadi Pirdaus
”Padang belantara lan tanah ané tuh lakar girang, padang gurun lakar mesuryak girang lan bek tumbuh bunga liar.”—NABI YESAYA 35:1.
Dugas Tuhan ngilangang kejahatan, guminé lakar dadi tongos ané luung! Ditu lakar ade taman lan kebun ané ngasilang dedaaran ané limpah. (Kidung 72:16) Pasihé, danuné, lan tukad-tukadé lakar kedas, liu ade bé ané idup ditu. Kayangé ento iraga tusing inget buin yén guminé taén usakange tekén manusané. Ditu tusing ade anak ané lacur, kuangan dedaaran, lan tusing ngelah umah. Krane anaké lakar ngaé umahné pedidi lan ngoyong ditu.—Nabi Yesaya 65:21, 22.
Tuhan Lakar Ngidupang Buin Anaké ané Sube Mati
”Lakar ade kebangkitan.”—PAMARGIN PARAUTUSAN 24:15.
Apaké ragané dot metemu buin ajak anak ané kesayangang ané sube mati? Tuhan ané Mahakuasa lakar buin ngidupang anaké ané sube mati di gumi pirdaus. Ragane lakar inget ajak ipun, kéto masi ipun lakar bise ngingetin ragane. Ditu iraga ajak mekejang pasti lakar bagia. Kenape iraga bise percaye tekén harapané ento? Krane di Cakepan Suci sube ade bukti-bukti anak bajang, anak cerik, ané sube idupange buin tekén Tuhan lan sube mekumpul buin ajak keluargané. Liu ané sube nyaksiang unduké ento. (Lukas 8:49-56; Yohanes 11:11-14, 38-44) Tusing ade ané tusing mungkin buat Tuhan ané Mahakuasa!
