Bufundiji Buleta Lukulupilo
Leza i mulaye kushinta kusangaja kusa kwikala’ko panopano ponka. Usa kutalula’ko masusu ne kulengeja bantu bekale na būmi bwa nsangaji pano pa ntanda. (Ñimbo ya Mitōto 37:11) Mwanda waka tubwanya kukulupila uno mulao? Mwanda “Leza ke muntupo wa bitupu ubepa bubela.” (Umbadilo 23:19) Tala’tu bidi bintu bimobimo biyampe bisa kulonga Umpangi wetu.
Leza Usa Kutalula’ko Bantu Babi
“Kitatyi kimena babi pamo bwa biyombo ne kimona banonga-bibi bonso biyampe, i mwanda wa batukijibwe fututu nyeke.”—ÑIMBO YA MITŌTO 92:7.
Monka motwekimwenanga mu kishinte kibadikile, bubi bwendanga buvudila’ko. Kino kekifwaninwepo kwitutulumuja. Mwanda kyālailwe kala mu Bible mu 2 Temote 3:1-5 amba, mu mafuku a mfulo bantu badi ba kubipila’ko bininge. Le mafuku a mfulo ya bika? I ya ntanda ya bantu bampikwa kukōkela Leza. Panopano ponka, Leza usa kutalula’ko boba bonso bapela kushinta mwiendelejo wabo mubi. Kukashala’nka bantu bayampe, boba bakōkele Leza. Bible unena’mba: “Boloke bakapyananga ntanda, kadi bakekalanga’po nyeke.”—Ñimbo ya Mitōto 37:29.
Leza Usa Konakanya Satana
“Leza mwine upāna ndoe usa kusonsakanya Satana.”—BENE LOMA 16:20.
Shi bantu bonso babi, kubadila’mo ne Satana ne bandemona bandi abatalulwa’ko, pano pa ntanda pakekala ndoe. Umpangi wetu i mulaye amba: “I kutupu muntu nansha umo [ukemukwatyija] moyo.”—Mika 4:4.
Leza Usa Kutalula’ko Misongo ne Lufu
“Pema wa Leza udi na bantu . . . Kadi ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—KUSOKWELWA 21:3, 4.
Masusu ne misongo kebikekala’kopo, mwanda Leza ukalongolola bintu byonso byonenwe na Satana, Adama, Eva, ne kubulwa kubwaninina kwetu. Enka “ne lufu [lwine] kelukekala’kopo dikwabo.” Bantu basenswe Umpangi wetu ne kumukōkela bakekala’ko nyeke. Ino le bakekala kwepi?
Umpangi Wetu Usa Kwalamuna Ntanda Ke Paladisa
“Mu ntanda mutuputupu ne ntanda myūmu tē bikasepelela, kadi dilungu mudi zolē dikasangala ne kutōya maluba pamo bwa safelona.”—ISAYA 35:1.
Leza pasa kutalula’ko bantu babi, ntanda isa kwikala ke paladisa! Pakekala bifuko bisangaja ne madimi, kadi ikalupula bya kudya bivule. (Ñimbo ya Mitōto 72:16) Kukekala tulunga-lui, majiba, ne minonga yampikwa busala kadi muyule mwita. Enka ne kishima “koneka kwa luvula” kekikatambepo mu kyakanwa kyetu! Bantu bakōbaka mobo ne kushikata’mo. I kutupu muntu ukabulwa pa kushikata, ukekala na nzala, nansha mulanda.—Isaya 65:21, 22.
Leza Ukasangula Bafwe
“Kukekalanga lusangukilo.”—BILONGWA 24:15.
Le usaka kukemona monka na baswe bobe bafwile? Leza mwinē bukomo bonso ukebasangula mu Paladisa pano pa ntanda. Ukebajiula, kadi nabo bakakujiula. Fwatakanya’po bidi momukasangela banwe bonso! Mwanda waka tubwanya kukulupila’mba uno mulao ukafikidila? Mwanda mu Bible mudi bimfwa bya bantu batame ne bana bāsangwilwe na Leza bājokela mu byabo bisaka. Kadi divule dine Yesu wāsangwile bantu koku bantu bavule bakwabo bamwene.—Luka 8:49-56; Yoano 11:11-14, 38-44.
Tala'po Bidi ne Bino:
LANGUKAI!
Ntanda Idi mu Madilo—Kinga Lukulupilo Lobe
Bible witukwashanga tulwe na makambakano a mu būmi ne kwitupa lukulupilo lwa būmi bwa kumeso.
BIPANGUJO BYA MU BIBLE BILONDOLWELWE
Lelo Lusangukilo I Bika?
Ubwanya kutulumuka pa boba bakasangulwa mu mafuku a kumeso.
ESSENTIAL BIBLE TEACHINGS
Lelo Bafwe Badi mu Ngikadilo’ka?
Bible i mulaye kitatyi kikasangulwa bantu bavule, enka na mwāsangwidilwe Lazalasa.
BIPANGUJO BYA MU BIBLE BILONDOLWELWE
Ndoe Pano pa Ntanda—Ikekala’po Namani?
Leza i mulaye kuleta ndoe pa ntanda kupityila ku Bulopwe bwandi. Tala mwasa kulongela.
