“Bika bantu kuzaba nde nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.”—NKUNGA 83:18.

Biblia ke longaka nde Yehowa kele Nzambi mosi kaka ya kieleka. Yandi muntu me salaka bima yonso. Yo me fwana nde beto sambila kaka yandi.—Kusonga 4:11.

“Nzambi kele zola.”—1 YOANE 4:8.

Yehowa ke sadilaka Biblia mpi bima yina yandi me salaka sambu na kulonga beto bikalulu na yandi. Zola kele kikalulu na yandi ya kuluta mfunu. Yandi ke salaka mambu yonso na zola. Kana beto longuka na kuzaba Yehowa, beto ta kuma kuzola yandi mingi.

“Nge kele Nzambi yina ke vandaka ya kuyilama na kulolula.”—NEHEMIA 9:17.

Yehowa me zaba nde beto kele bantu ya kukonda kukuka. Yo yina yandi “ke vandaka ya kuyilama na kulolula” beto. Kana beto songa yandi nde mambu ya beto salaka me pesa beto mpasi mpi beto sala ngolo sambu na kusala yo diaka ve, yandi ta lolula beto mpi yandi ta pesa beto ve ndola sambu na masumu yina beto salaka ntama.—Nkunga 103:12, 13.

“Yehowa kele pene-pene ya bantu yonso yina ke bingaka yandi . . . Yandi ke waka kudila na bo sambu na kulomba lusadisu.”—NKUNGA 145:18, 19.

Yehowa ke lombaka beto ve na kulanda bansiku ya bwala na beto to na kusadila bifwanisu to bima ya nkaka sambu na kusambila yandi. Yandi ke waka bisambu na beto kaka mutindu bibuti yina ke zolaka bana na bo ke waka mambu yina bana ke tubaka.