Zibo Yelutusa Kuba Balikani ba Mulimu
Mubupi waluna haki maata feela. Unani tulemeno totunde hahulu. Ubata kuli lumuzibe ni kuba balikani bahae. (Joani 17:3; Jakobo 4:8) Ki lona libaka halutaluselize lika zeñata ka za hae.
Mubupi Waluna Unani Libizo
“Haike batu bazibe kuli wena, wa libizo la Jehova, ki wena unosi Yapahami ka Kufitisisa fahalimwaa lifasi kaufela.”—SAMU 83:18.
Bibele iluta kuli Jehova ki yena Mulimu anosi wa niti. Ki yena Mubupi wa lika kaufela. Ki yena feela yeluswanela kulapela.—Sinulo 4:11.
Jehova ki Mulimu ya Lilato
“Mulimu ki lilato.”—1 JOANI 4:8.
Jehova uitusisa Bibele ni lika zabupile kuli alulute kuziba mwainezi. Lilato ki kona kalemeno ka butokwa hahulu kanani kona. Lika kaufela zaeza uliezanga ka lilato. Haluituta hahulu ka za Jehova, luka mulata hahulu.
Jehova Walata Kuswalela
“U Mulimu yalata kuswalela.”—NEHEMIA 9:17.
Jehova waziba kuli halusika petahala. Kacwalo, ‘walata kuluswalela.’ Haluikupela swalelo ku yena ni kueza molukonela kaufela kutuhela lika zemaswe, uka luswalela mi haana kulufa koto kabakala libi zene luezize kwamulaho.—Samu 103:12, 13.
Jehova Ulumema Kulapela ku Yena
“Jehova u fakaufi ni babahuweleza ku yena kaufela . . . Uutwa muhuwo wabona wa kuli abatuse.”—SAMU 145:18, 19.
Halutokwi kulatelela lizo kamba kuitusisa maswaniso ni lika zeñwi kwa kulapela Jehova. Wateelezanga kwa litapelo zaluna sina feela bashemi baba lilato habateelezanga kwa bana babona.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Jehova ki Mañi?
Kana ki Mulimu wa sicaba silisiñwi feela, inge cwalo Maisilaele?
