Dimanya didi ditusemeja pabuipi ne Nzambi
Mufuki wetu ki mbukole kampanda patupu to. Udi ne ngikadilu milenga. Mmusue tulonge malu ende ne tusemene pabuipi nende. (Yone 17:3; Yakobo 4:8) Ke bualu kayi mmutusokoluele malu a bungi adi amutangila.
Mufuki wetu udi ne dîna dia nsungansunga
“Bamanye ne: wewe, udi ne dîna dia Yehowa, wewe nkayebe ke Mutambe Bunene pa mutu pa buloba bujima.”—MISAMBU 83:18.
Bible utu ulongesha ne: Yehowa ke Nzambi umuepele mulelela. Yeye ke Mufuki wa diulu ne buloba ne wa bintu bionso bidi ne muoyo. Yeye nkayende ke udi mukumbane bua tuetu kutendelela.—Buakabuluibua 4:11.
Yehowa nNzambi wa dinanga
“Nzambi udi dinanga.”—1 YONE 4:8.
Yehowa mmutuleje ngikadilu yende ya bungi ku diambuluisha dia Bible ne dia bintu bidiye mufuke. Dinanga ke ngikadilu wende mutambe bunene. Didi dileja tshidiye. Tuetu tulonga malu a Yehowa bikole, netumunange kabidi bikole.
Yehowa nNzambi udi ubuikidilangana
“Wewe udi Nzambi udi mudiakaje bua kubuikidilangana.”—NEHEMIYA 9:17.
Yehowa mmumanye ne: tudi bapange bupuangane. Ke bualu kayi ‘mmudiakaje bua kutubuikidila.’ Patudi tumuleja mutudi tumvua bibi bua malu mabi atudi benze ne tudienzeja bikole bua kualekela, udi utubuikidila, kayi ushala utubadila mpekatu yetu ayi to.—Misambu 103:12, 13.
Yehowa utu uteleja masambila etu
“Yehowa udi pabuipi ne bonso badi bamubila . . . Udi umvua muadi wabu wa dilomba diambuluisha.”—MISAMBU 145:18, 19.
Yehowa kena ulomba ne: tuenze mikiya ya pabuayi anyi tuikale ne mpingu peshi bimfuanyi kampanda bua kumutendelela to. Udi uteleja masambila etu anu mudi baledi bimpe bateleja bana babu badibu banange.
Mona bikuabu:
MANDAMUNA A NKONKO YA MALU A MU BIBLE
Yehowa nnganyi?
Udi Nzambi wa tshisamba tshimuepele patupu, bu mudi tshia Isalele anyi?
MANDAMUNA A NKONKO YA MALU A MU BIBLE
Nzambi utu umvua mutu bantu bumvua anyi?
Bible udi uleja ne: Nzambi wakafuka bintu bionso, kadi utu ututabalela anyi?
