“Vanhu a va swi tive leswaku wena loyi vito ra wena ku nga Yehovha, hi wena ntsena La Nge Henhlahenhla emisaveni hinkwayo.”—PISALEMA 83:18.

Bibele yi dyondzisa leswaku Yehovha i Xikwembu xin’we xa ntiyiso. I Muvumbi wa vuako hinkwabyo ni swilo hinkwaswo leswi hanyaka. Hi yena ntsena loyi hi faneleke hi n’wi gandzela.—Nhlavutelo 4:11.

“Xikwembu i rirhandzu.”—1 YOHANE 4:8.

Yehovha u tirhisa Bibele ni swilo leswi a swi tumbuluxeke leswaku a hi dyondzisa vumunhu byakwe. Rirhandzu hi byona vumunhu bya nkoka swinene bya yena. Hinkwaswo leswi a swi endlaka u swi endla hi rirhandzu. Loko hi ya hi dyondza hi Yehovha, hi ta ya hi n’wi rhandza swinene.

“U Xikwembu lexi tiyimiseleke ku rivalela.”—NEHEMIYA 9:17.

Yehovha wa swi tiva leswaku a hi hetisekanga. Hikwalaho “u tiyimisele ku [hi] rivalela.” Loko hi n’wi byela leswaku a hi khomela kutani hi tirha hi matimba ku tshika ku endla swilo swo biha, u ta hi rivalela naswona a nge hi xupuli hikwalaho ka swidyoho leswi hi swi endleke enkarhini lowu nga hundza.—Pisalema 103:12, 13.

“Yehovha u le kusuhi ni hinkwavo lava n’wi vitanaka . . . U twa xirilo xa vona xo kombela ku pfuniwa.”—PISALEMA 145:18, 19.

A hi fanelanga hi endla mihivahivana yo karhi kumbe hi tirhisa swifaniso kumbe swilo swin’wana leswaku hi gandzela Yehovha. U yingisa swikhongelo swa hina hilaha vatswari lava nga ni rirhandzu va yingiselaka vana va vona lava va va rhandzaka.