Snaʼbeyel sba te Dios ya yakʼ xnoptsajotik ta stojol
Te Jpaswanej kuʼuntik bayal tʼujbil taleliletik yuʼun. Te bitʼil ya skʼan ya jnaʼbeytik sba sok te ya kamigointik, yalojbotik te bin yilel te stalel (Juan 17:3; Santiago 4:8).
Ay sbiil te Jpaswanej kuʼuntike
«Acʼa snaʼic te ha Jehová te abihile, te haʼat atuquel te Machʼa toyol ayat ta stojol spahmal te qʼuinale» (SALMO 83:18).
Te Biblia ya yal te jaʼnax smelelil Dios te Jehová sok te jaʼ la spas spisil te bintik ay ta chʼulchan sok ta Balumilal soknix te kuxlejalile. Jaʼ yuʼun snujpʼ te jaʼnax ya kichʼtik ta mukʼ (Apocalipsis 4:11).
Te Jehová jaʼ kʼuxul oʼtanil
«Jcʼuxultaywanej stuquel te Diose» (1 JUAN 4:8).
Te Jehová ya stuuntes te Biblia sok spisil te bintik spasoj, yuʼun ya yakʼbotik kiltik te bin yilel te stalele. Te talelil te kʼax chikan ta ilel jaʼ te kʼuxul oʼtanil, melel spisil ya spas sok skʼuxul yoʼtan. Te bitʼil ya jnaʼbeytikxan sba te Jehová, ya xchʼixan te skʼuxul koʼtantik ta stojol.
Te Jehová ya spas perdón
«Haʼat Diosat te yac apas perdón» (NEHEMÍAS 9:17).
Te Jehová ya snaʼ te maba tojotik, jaʼ yuʼun ya spasbotik perdón. Teme ya jkʼanbeytik perdón sok ya jpastik tulan te manchuk ya jpastik te bin ma smulane, yame spasbotik perdón sok ma stabotikix ta alel te jmultike (Salmo 103:12, 13).
Te Jehová ya smulan te ya jkʼopontik
«Nopol ay te Jehová ta stojol spisil machʼatic ya scʼoponic [...]; ya yaʼiybe yawic soc ya scoltaylan» (SALMO 145:18, 19).
Te Jehová ma skʼan te ya jtuuntestik lokʼombaetik yuʼun ya kichʼtik ta mukʼ. Ya yaʼiybotik jkʼoptik jich bitʼil jtul tatil te ya yaʼiybey skʼop te snichʼane.
