Mi laj kojtikintik li Diose chijnopaj ta stojol
Kuxul li Jpasvanej kuʼuntike xchiʼuk labalik sba li stalelaltake. Tskʼan ti xkojtikintike xchiʼuk ti xijkʼot ta yamigoe, jaʼ yuʼun ep kʼusitik yalojbutik ta stojolal (Juan 17:3; Santiago 4:8).
Oy sbi li Jpasvanej kuʼuntike
«Akʼo snaʼik krixchanoetik ti jaʼ Jeova li abie, ti voʼot noʼox atuk ti Buchʼu toj toyol oyot ta spʼejel balumile» (SALMO 83:18).
Li Vivliae chchanubtasvan ti jaʼ melel Dios li Jeovae ti jaʼ la spas li vinajel balumile xchiʼuk jaʼ laj yakʼ li jkuxlejaltike. Jaʼ yuʼun, jaʼ noʼox stuk ti sta-o xkichʼtik ta mukʼe (Apokalipsis 4:11).
Li Jeovae jaʼ jun Dios ti snaʼ xkʼanvane
«Jaʼ kʼanelal li Diose» (1 JUAN 4:8).
Li Jeovae tstunes Vivlia xchiʼuk spasbentak sventa xchanubtasutik kʼu yelan li stuke. Li stalelal ti mas chakʼ ta ilele jaʼ li kʼanelale, yuʼun ta kʼanelal tspas skotol li kʼusitike. Kʼalal mas chkojtikintik li Jeovae, mas to ta jkʼantik.
Ch-akʼvan ta perton li Jeovae
«Voʼot li Diosot ti chapalot ta yakʼel pertone» (NEEMIAS 9:17).
Li Jeovae snaʼoj ti maʼuk tukʼil krixchanoutike, jaʼ yuʼun chakʼutik ta perton. Mi la jkʼanbetik pertone xchiʼuk mi laj kiktatik spasel li kʼusi chopol chile, ta me spasutik ta perton xchiʼuk muʼyuk chakʼbutik kastigo (Salmo 103:12, 13).
Li Jeovae tskʼan ti akʼo jkʼopontike
«Li Jeovae nopol oy ta stojolal skotol li buchʼutik tskʼanbeik vokole, [...] chchikintabe kʼalal xvokolet tskʼanik koltaele xchiʼuk tskolta» (SALMO 145:18, 19).
Li Jeovae mu skʼan ti oy kʼusi labalik xa sba ta jpastik kʼalal chkichʼtik ta mukʼe o ti jtunestik lokʼoletike. Yuʼun li Stuke chchikinta li j-orasiontike jech kʼuchaʼal jun jkʼanvanej totil ti chchikintabe skʼop li xnichʼnabtake.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Buchʼu jaʼ li Jeovae?
¿Mi jaʼ noʼox van Sdiosik li j-israeletike?
