Pero jiñi muʼ bʌ i ñumen cʼʌñob jiñi tecnología chaʼan miʼ pejcan i yamigojob miʼ mejlel i tajob ili wocol tac:

• Maʼañic miʼ mejlel i yubin muʼ bʌ i yubin i yamigojob.

• I bajñel miʼ yubiñob i bʌ.

• Miʼ ñumen ñaʼtañob i bʌ i mach jiñic yambʌlob.

MI LA CUBIN BAJCHEʼ YUBIL MIʼ YUBIN I BɅ YAMBɅLOB

Chaʼan miʼ mejlel la cubin bajcheʼ miʼ yubin i bʌ yambʌ, yom mi la cʌqʼuen i yorajlel i mi lac ñop lac ñaʼtan. Ili maʼañic mi caj i mejlel lac mel mi cabʌl jax chuqui woli lac pejcan yaʼ ti Internet yicʼot woli lac choc tac majlel mensaje.

Ti wiʼil, mi jiñi tecnología ñaxan mi la cʌcʼ ti laj cuxtʌlel miʼ caj la cubin bajcheʼ jumpʼejl al bʌ laj cuch cheʼ mi lac jacʼbeñob i mensaje jiñi la camigojob. Mi cheʼ bajcheʼ jiñi, tajol mi caj lac jacʼ jiñi mensaje tac, pero mach chaʼañix mi laj coltan jiñi la camigo woli bʌ i ñusan wocol.

ÑAʼTANCU ILI: ¿Bajcheʼ miʼ mejlel a pʌs chaʼan cheʼʌch maʼ wubin bajcheʼ miʼ yubiñob i bʌ a wamigojob cheʼ bʌ maʼ cʼʌn jiñi tecnología? (1 PEDRO 3:8).

CHEʼ BAJÑEL MI LA CUBIN LAC BɅ

Jumpʼejl estudio tsaʼ bʌ mejli tsiʼ yʌlʌ chaʼan yonlel jiñi lac piʼʌlob mach tijicñayic tsiʼ yubiyob i bʌ cheʼ cabʌl ora tsiʼ ñusayob i qʼuel chuqui tac miʼ letsʌntel ti Internet. Tsaʼ ajli chaʼan cheʼ bʌ mi laj qʼuel jiñi foto yicʼot comentario tac muʼ bʌ i cʼʌjquesañob yambʌlob «miʼ mejlel i yʌqʼueñonla la cubin chaʼan maʼañic chuqui wen ñuc bʌ woli lac mel ti laj cuxtʌlel».

Cheʼ mi laj qʼuel jiñi foto tac baqui wen tijicña woliʼ ñusañob yambʌlob tajol miʼ lac laj lac bʌ yicʼotob i mi lac ñaʼtan chaʼan joñonla bʌ maʼañic woli lac wen ñusan lac bʌ.

ÑAʼTANCU ILI: ¿Chuqui miʼ mejlel a mel chaʼan maʼañic maʼ laj a bʌ yicʼot yambʌlob cheʼ bʌ maʼ qʼuel chuqui tac miʼ letsañob ti Internet? (GÁLATAS 6:4).

CHEʼ MI LAC ÑUMEN ÑAʼTAN LAC BɅ I MACH JIÑIC YAMBɅLOB

Juntiquil xmaestra tsiʼ yʌlʌ chaʼan an i yalumnojob cojach bʌ miʼ bajñel ñaʼtañob i bʌ, i cheʼ jaʼel miʼ sʌclan i yamigojob mejl bʌ i coltañob i mel chuqui yomob. * Cheʼ bʌ amigojob bajcheʼ jiñi cojach miʼ sʌclañob chuqui ti wenlel miʼ mejlel i taj tiʼ tojlel jiñi yambʌlob. I mi cheʼ bajcheʼ jiñi, miʼ mejlel i tech i qʼuel i yamigojob bajcheʼ jumpʼejl aplicación muʼ bʌ i ñupʼ o miʼ jam cheʼ bʌ i cʼʌjñibal i chaʼan.

ÑAʼTANCU ILI: ¿Muʼ ba i pʌs jiñi muʼ bʌ a cʼʌjquesan ti Internet chaʼan jatet jach ñumen a wujil yicʼot chaʼan jatet jach maʼ ñaʼtan a bʌ? (GÁLATAS 5:26).

ÑAʼTAN BAJCHEʼ MAʼ CʼɅN JIÑI TECNOLOGÍA

Mi tsajal bajcheʼ maʼ cʼʌn jiñi tecnología i pʼisbil jach bajcheʼ maʼ cʼʌn, miʼ caj i coltañet chaʼan maʼ pejcan a wamigojob yicʼot chaʼan ñumen lʌcʼʌl maʼ wajñel a wicʼotob.

Qʼuele jiñi a wom tac bʌ a mel o tsʼijbun yan tac bʌ muʼ bʌ a mulan a mel:

• Mic ñumen chaʼlen tʼan quicʼot yambʌ i mach jiñic cheʼ mic chocben majlel mensaje o correo.

• Mic jumucʼ cʌy c celular o mi cʌcʼ chaʼan maʼañic miʼ sub i bʌ cheʼ bʌ woliyon ti tʼan quicʼot yambʌlob.

• Mach cabʌlix ora mic ñusan j qʼuel chuqui tac miʼ cʼʌjquesʌntel yaʼ ti Internet.

• Mic ñʌchʼtan chuqui miʼ yʌl yambʌlob.

• Mic pejcan juntiquil camigo woli bʌ i ñusan wocol.