Akanasaʼa na wayuu yootokana waneepia sümaa naʼaleewainyuu sükajee tia, eesü süpüla sülatüin namüin tüü:

• Nnojoleerü kapülain naaʼin nakuwaʼipa naʼaleewainyuu.

• Meena namüiwaʼakai naaʼin.

• Jülüjeerü naaʼin nakuwaʼipa neʼe namüiwaʼa.

NNOJOLEERÜ WAMÜLIAJÜIN WAYUU

Süpüla wamüliajüin wayuu, jülüjainjatü waaʼin jamüin saaʼin. Nnojoleerü müin wakuwaʼipa waneepiale waya suluʼu redes sociales jee sünain aluwanaaja mensaaje.

Wattale saalii mensaaje aluwataanaka pümüin eesü süpüla püshajamaatüin namüin na ashajakana pümüin sümaa nnojoluin jülüjain paaʼin tü nüküjeekat pümüin wanee paʼaleewain, nnojoleerü piyaawatüin saaʼu choʼujaain nükaalinjünüin.

JÜLÜJA PAAʼIN TÜÜ: ¿Kasa paaʼinrajatka süpüla kapülain paaʼin nakuwaʼipa paʼaleewainyuu yootopa pia namaa suluʼupünaa computador jee serulaat? (1 PEDRO 3:8).

MOJEERÜ WAAʼIN

Naashin waneinnua wayuu, mojuleesia maʼin naaʼin na wayuukana waneepiale naya sünain redes sociales otta eesü süpüla jülüjain naaʼin analeein maʼin nakuwaʼipa noulia sutuma neʼrajüin shiyaakua wayuu jee tü nashajakat süchiki tü kasa naaʼinrakat suluʼu redes sociales.

Weʼrüle nayaakua na waneinnua süchiki tü naaʼinrakat, eesüjaʼa wayoujireʼerüle wakuwaʼipa namaa otta jülüjain waaʼin talatüin maʼin naaʼin woulia.

JÜLÜJA PAAʼIN TÜÜ: ¿Kasa waaʼinrüinjatka suulia wayoujireʼerüin wakuwaʼipa namaa na waneinnua suluʼupa waya redes sociales? (GALACIA 6:4).

JÜLÜJEERÜ WAAʼIN WAKUWAʼIPA NEʼE WAMÜIWAʼA

«Jülüjasü naaʼin waneinnua tekirajüin nakuwaʼipa neʼe namüiwaʼa, naya neʼe naʼaleewajaaka amaa na akaalinjakana naya jee na anakana ashoʼu namüin», müsü sünüiki wanee ekirajüt. * Müle nukuwaʼipa wanee wayuu, eeshii süpüla müin aka saaʼin wanee serulaat nümüin na naʼaleewainkana süka müin nuchuwajaakai aaʼin choʼujaapa naya nümüin.

JÜLÜJA PAAʼIN TÜÜ: ¿Jaʼyasüche paaʼu piyoujireʼerüin pukuwaʼipa sümaa wayuu jee jülüjain paaʼin pukuwaʼipa neʼe pümüiwaʼa sünainjee tü piʼitaakat suluʼu Internet? (GALACIA 5:26).

JÜLÜJA PAAʼIN TÜ PAAʼINRAJATKAT SÜKA COMPUTADOR JEE SERULAAT

Anale sukuwaʼipa putuma computador jee serulaat, nnojoleerü mojuin pukuwaʼipa, yooteechi pia namaa paʼaleewainyuu jee aleeweechi maʼin pia namaa.

Pejeetta tü puuʼulaküinjatkat jee shiale püshajüin tü anakat saaʼin pümüin:

• Aashajaweeshi maʼin taya sümaa wayuu suulia taluwataain namüin mensaaje jee correo.

• Nnojoluinjatü taapaain serulaat taashajaapa sümaa wayuu.

• Nnojoluinjatü siraain kaʼi taaʼu sünain anajaa redes sociales.

• Jülüjainjatü taaʼin nanüiki na waneinnua naashajaapa tamaa.

• Aashajaainjachi taya nümaa wanee taʼaleewain eekai sülatüin nümüin kasa mojusü.