To, nega momo edia turadia be fon amo idia hereva henia taudia haida be inai hekwakwanai idia davaria . . .

• edia turadia dekenai hebogahisi karana idia hahedinaraia lasi.

• sibona idia noho dainai idia lalohisihisi bona idia mamia edia mauri be anina lasi.

• sibona edia ura idia laloa bada, bona ma haida idia laloa lasi.

EDIA HEMAMI LALOA

Ma haida edia hemami ita laloa ena anina be ita haraga lasi, to mai haheauka ida edia hemami ita laloa guna. Fon ita gaukaralaia neganai, unai ita karaia be ia auka sisina, badina social media ai laulau bona vidio momo herea idia mai, bona teks mesiji momo ita ura duahia bona haloua haraga.

Fon ese oi ia biagua neganai, do oi mamia emu turadia edia teks mesiji oi haere henia be gaukara ta sibona. Emu ura badana be mesiji ibounai do oi haere henia, to nega oi atoa lasi hekwakwanai ia davaria turana ta oi durua totona.

INAI OI LALOA: Fon amo emu turadia oi hereva henia neganai, edena bamona do oi hahedinaraia idia “ta ta [oi] laloa bada”? ​—⁠1 PETERO 3:8.

MAURI BE ANINA LASI

Ripoti ta ia hahedinaraia, momo be nega bada lalonai social media idia gaukaralaia murinai idia lalohisihisi. Ma ia gwau, unai taudia be haida edia laulau idia itaia murinai, “idia mamia edia nega idia haorea kava bona gau namona ta idia karaia lasi.”

Ma danu, haida edia moale karadia edia laulau idia itaia murinai, idia ese edia mauri be unai taudia edia mauri ida idia hahegeregerea, bona idia mamia edia mauri be anina lasi. Toana be taunimanima ibounai be idia moale noho, to idia be idia moale lasi.

INAI OI LALOA: Social media oi itaia neganai, edena dala ai emu mauri be ma haida edia mauri ida oi hahegeregerea karana oi dadaraia diba? ​—⁠GALATIA 6:4.

SIBONA OI LALOA BADA

Tisa ta ia gwau, stiuden haida be sibodia edia namo idia laloa bada dainai, edia turadia amo do idia abia gaudia sibona idia tahua. Idia laloa edia turadia be fon ta bamona, ia idia hamoalea totona ia kehoa bona ia ura lasi neganai ia habodoa.

INAI OI LALOA: Social media ai emu laulau idia hahedinaraia oi be ma haida ida oi kara helulu o sibona oi laloa bada, a? ​—⁠GALATIA 5:26.

SIBONA OI SEKEA

Bema mobael fon be emu biaguna lasi to emu hesiai tauna, oi do ia durua emu hetura karana emu turadia ida oi hagoadaia totona.

Oi ura badinaia herevadia oi makaia, eiava oiemu lalohadai oi torea.

• Emu turana oi hedavari henia bona umui herevahereva (teks mesiji o email sibona oi gaukaralaia lasi)

• Ma haida ida oi herevahereva lalonai, namona be emu fon oi atoa siri (o regena oi koua)

• Social media oi gaukaralaia horadia oi hamaragia

• Emu turadia edia hereva oi kamonai namonamo

• Hekwakwanai lalonai ia noho turana ta oi rini henia