Baka Ni Teknologi Nekul Kaul Nuan enggau Orang Bukai?
Dua iku orang ke jauh ulih berandau enggau senang nengah mesej, email, video call, sereta media sosial. Sida ulih dikumbai ngena teknologi enggau chara ti betul.
Tang, orang ke bepanggai ngagai teknologi maya deka berandau enggau kaban engka . . .
-
kurang ngayanka penyiru ngagai kaban sida.
-
berasai puang sereta asa ati.
-
lebih berundingka diri empu.
UTAI KE PATUT DITEMU NUAN
NADAI PENYIRU
Ngambika nemu asai ati seseiku orang, kitai patut ngiga awak berunding pasal orang nya. Tang, pekara tu tusah deka digaga lebuh kitai kisuk macha sereta malas mesej, tauka meda post ba media sosial.
Enti nuan nerima kelalu mayuh mesej, nuan engka berasai tusah deka malas mesej ari kaban nuan. Enda ngira mesej ke diterima nya penting tauka enda, nuan engka semina deka malas semua mesej tu enggau jampat, nyentukka nuan enda sedar bisi kaban ke begunaka bantu.
PIKIRKA: Baka ni nuan ulih ‘ngayanka penyiru’ lebuh ngena teknologi, maya berandau enggau kaban nuan?—1 PETER 3:8.
PUANG SERETA ASA ATI
Nitihka siti pansik, mayuh orang berasai asa ati pengudah ngena media sosial. Bala pemansik tetemuka, pengudah orang ngena awak meda gambar enggau status baru orang bukai, sida engka “berasai masau awak sida.”
Nambahka nya, pengudah meda gambar ti lawa ke diayanka orang bukai, kitai engka ngumbai pengidup sida amat ngerinduka ati tang pengidup kitai enda ngerinduka ati.
PIKIRKA: Lebuh ngena media sosial, baka ni nuan ulih nyeliahka diri ari enda temegahka diri empu, lalu enda mandingka diri enggau orang bukai?—GALATIA 6:4.
BERUNDINGKA DIRI EMPU
Seiku cikgu nulis, sekeda pemelajar iya bisi ngembuan ulah berundingka diri empu, lalu semina deka begulai enggau kaban ke ulih meri penguntung ngagai sida. * Ba orang ke baka tu, bala kaban iya semina nyadika palan iya bepanggai maya diguna, tang dibuai ketisi lebuh enda beguna ba iya.
PIKIRKA: Kati utai ke dipost nuan ngayanka penyumbung, nyemekih orang tauka ngasuh orang ngining?—GALATIA 5:26.
UJI BERATIKA
CHARA NUAN NGENA TEKNOLOGI
Enti nuan nguasa lalu ukai dikuasa teknologi, nuan ulih suah berandau enggau bala kaban, indah nyadi rapat agi ari selama.
PRINSIP BUP KUDUS: “Pengerindu enda berundingka diri empu.”—1 KORINT 13:4, 5.
Tandaka chara ke deka dikena nuan, tauka tuliska idea nuan empu.
-
Suah agi berandau betunga mua (ari ke suah nganjung mesej tauka email aja)
-
Simpan talipun nuan (tauka silent mod) lebuh berandau enggau orang bukai
-
Kurangka awak meda media sosial
-
Nyadi peninga ti manah
-
Betalipun ngagai seiku kaban ke benung napi penusah
^ per. 17 Nitihka riput bup Reclaiming Conversation.
Nuan Engka Rindu Meda Tu
TANYA ARI BALA NEMBIAK
Utai ke Patut Ditemu Aku Pasal Bekunsika Gambar Nengah Internet
Bekunsika gambar nengah online siti chara ti pemadu jampat sereta senang ngambi ulih begigaka bala kaban sereta diri sebilik. Tang, nya bisi penanggul iya empu.
