Kasano nga Apektaran ti Teknolohia ti Pannakigayyemmo?
Gapu iti text, email, videoconference, ken social media, nalaka a makapagkomunikar ti dua a tao uray aginnaddayoda. Para kadakuada, dakkel ti maitulong ti teknolohia.
Ngem dadduma nga agpampannuray laeng iti teknolohia a makikomunikar kadagiti gagayyemda ket mabalin a . . .
-
saanda unay a maipakita ti pannakaseknan kadagiti gagayyemda.
-
nalidliday ken kasla awan serserbi ti biagda.
-
nakapokusda laeng iti bagbagida imbes nga iti sabsabali.
TI MASAPUL A MAAMMUAM
EMPATIA
Tapno maipakitatayo ti empatia iti sabali a tao, masapul nga iwayaantayo a panunoten ti kasasaadna. Narigat nga aramiden daytoy no busy-tayo iti text ken social media.
Inton agangay, kontroladonakan ti teknolohia ket ibilangmonton a dadagsen ti panangsungbat kadagiti mensahe dagiti gagayyemmo. Mabalin a kontentokan basta makasungbatka laeng, ngem saanmo a madlaw nga adda gayam gayyemmo nga agkasapulan iti tulong.
PANUNOTEM: Kasanom a maipakita ti “pannakipagrikna” no agus-usarka iti teknolohia a makikomunikar kadagiti gagayyemmo?—1 PEDRO 3:8.
KINALIDAY
Ipakita ti maysa a panagadal nga adu a tattao ti ad-adda a nadepres kalpasan ti panangbusbosda iti tiempo iti social media. Imbaga dagiti researcher a no sangkakita ti maysa dagiti piktiur ken post ti sabsabali, mabalin a “mariknana a nasayang laeng ti orasna.”
Maysa pay, mabalin nga ay-ayenda ti bagida no makitada dagiti nagpipintas a piktiur nga im-post ti sabsabali. Ngamin, pagparangen ti social media a kasla kanayon nga agragragsak ti sabsabali idinto ta sika ket saan.
PANUNOTEM: No agus-usarka iti social media, kasanom a maliklikan nga ikompara ti bagim iti sabsabali?—GALACIA 6:4.
PANAGPOKUS ITI BAGI
Imbaga ti maysa a titser a dadduma kadagiti estudiantena ket bagida laeng ti pampanunotenda. Gayyemenda laeng dagiti adda maitulongna kadakuada. Mabalin nga ibilang ti maysa a kasla app dagiti gagayyemna nga usarenna laeng no kasapulanna sa iserrana no saannan a kasapulan.
PANUNOTEM: Makita kadi kadagiti post-mo nga adda tendensiam a makikompetensia wenno nakapokuska laeng iti bagim?—GALACIA 5:26.
TI MABALINMO NGA ARAMIDEN
USIGEM TI PANANGUSARMO ITI TEKNOLOHIA
No kontroladom ti panangusarmo iti teknolohia, matulongannaka a makikomunikar kadagiti gagayyemmo ken patibkerenna pay ti panaggagayyemyo.
PRINSIPIO TI BIBLIA: “Ti ayat . . . saanna a sapulen ti bukodna a pagimbagan.”—1 CORINTO 13:4, 5.
Kitaem dagiti suhestion a kayatmo nga aramiden, wenno isuratmo dagiti bukodmo nga ideya.
-
Makisarita iti personal (imbes a text wenno email laeng)
-
Iyadayo (wenno i-silent) ti selpon no makisarsarita iti sabsabali
-
Kissayan ti oras iti social media
-
Agbalin a nalalaing a dumngeg
-
Kontaken ti maysa a gayyem nga adda problemana
Baka Kayatmo Met ti
AGRIINGKAYO!
Ania ti Nasayaat a Gayyem?
Para iti kaaduan, napateg ti maaddaan iti nasayaat a gagayyem. Kasanoka nga agbalin a nasayaat a gayyem? Usigen daytoy nga artikulo ti 4 a makatulong a prinsipio ti Biblia.
SALUDSOD DAGITI AGTUTUBO
Ania ti Masapul a Maammuak iti Panangi-share iti Picture Online?
Ti panangi-post online kadagiti nagustuam a picture ket kombiniente a pamay-an tapno ma-update-mo dagiti gagayyem ken kapamiliam, ngem adda met dagiti masapul a pagannadam.
AGRIINGKAYO!
Panangipakita iti Nasayaat a Kababalin iti Panagteks
Kinaawan respeto kadi ti mangisardeng iti saritaan tapno laeng basaem ti teksmo? Wenno kinaawan respeto kadi ti di panangikankano iti teks tapno laeng maituloymo ti pannakisaritam?
