Chanru tixkʼe saʼ chʼaʼajkilal li Internet laaʼamiiwil
Anaqwan nokooruuk chi aatinak rikʼinebʼ li junchʼol usta najt wankebʼ, saʼebʼ li esil li nataqlamank saʼ selular, saʼ li ululchʼiichʼ malaj saʼ Internet. Joʼkan naq wank rusilal ebʼ li kʼanjelobʼaal aʼin.
Abʼanan wank wiibʼ oxibʼ li kristiʼaan li nekeʼroksi li kʼanjelobʼaal chʼiichʼ re aatinak rikʼinebʼ li ramiiw ut naru nekeʼok chi naʼlebʼak chi joʼkaʼin:
-
Inkʼaʼ chik nekeʼxkʼe saʼ ajl li nekeʼrekʼa ebʼ li ramiiw.
-
Junelik nekeʼrekʼa ribʼ xjunes.
-
Kaʼajwiʼ nekeʼxkʼoxla ribʼ xjunes ut moko nekeʼxkʼoxla ta ebʼ li junchʼol.
LI TENTO XNAWBʼAL
TAW RU LI NEKEʼREKʼA EBʼ LI JUNCHʼOL
Re xtawbʼal ru junaq li kristiʼaan tento tqakʼoxla ut tqakʼe saʼ ajl li narekʼa. Abʼanan, inkʼaʼ tooruuq xbʼaanunkil aʼin wi laatzʼ qu chi xyaabʼasinkil malaj chi xtaqlankil ebʼ li esil saʼ Internet.
Wi naqakanabʼ naq ebʼ li kʼanjelobʼaal chʼiichʼ teʼoq chi taqlank saʼ li qayuʼam, moko sa ta chik tqil xsumenkil ebʼ li esil li nekeʼxtaqla chaq ebʼ li qamiiw. Saʼ xkʼabʼaʼ naq naqaj xsumenkil chixjunil ebʼ li esil li nekeʼxtaqla chaq qe, inkʼaʼ chik naqakʼe reetal ani rehebʼ li qamiiw naraj tenqʼaak.
KʼOXLA AʼIN: Chanru tooruuq xkʼutbʼesinkil li tawok u naq tqoksi ebʼ li kʼanjelobʼaal chʼiichʼ re aatinak rikʼinebʼ li qamiiw? (1 PEDRO 3:8).
NAQ QAJUNES NAQEKʼA QIBʼ
Ebʼ li nekeʼxtzʼil rix li jalan jalanq chi naʼlebʼ, xeʼxkʼe reetal naq ebʼ li kristiʼaan moko sa ta chik nekeʼrekʼa ribʼ naq nekeʼxnumsi naabʼal li hoonal chi rilbʼal li wank saʼ Internet. Joʼkan ajwiʼ xeʼxkʼe reetal naq rilbʼal ebʼ li jalam u ut li nekeʼxye ebʼ li junchʼol «naxbʼaanu naq tqekʼa naq maakʼaʼ rusilal li qayuʼam».
Naq naqil li nekeʼxbʼaanu ebʼ li junchʼol saʼebʼ li xjalam u, naru nokooʼok chi xjuntaqʼeetankil li qayuʼam rikʼinebʼ ut chi xkʼoxlankil naq aʼanebʼ sahebʼ saʼ xchʼool aʼut laaʼo maakʼaʼ xyaalal li qayuʼam.
KʼOXLA AʼIN: Kʼaru tatruuq xbʼaanunkil re naq inkʼaʼ taajuntaqʼeeta laayuʼam rikʼinebʼ li junchʼol naq taawil junaq li naʼlebʼ saʼ Internet? (GÁLATAS 6:4).
NAQ KAʼAJWIʼ LAAʼO NAQAKʼOXLA QIBʼ
Jun laj kʼutunel kixye naq wankebʼ li xtzolom kaʼajwiʼ nekeʼxkʼoxla ribʼ xjunes, nekeʼxsikʼ li us choʼq rehebʼ ut nekeʼramiiwi ebʼ li kristiʼaan li teʼruuq taqlank saʼ xbʼeenebʼ. Wank saʼ amiiwil chi joʼkaʼin, kaʼajwiʼ naxkʼam chaq rusilal choʼq re jun ajwiʼ chi kristiʼaan. Joʼkan naq junaq naru naʼok chi xkʼoxlankil naq ebʼ li ramiiw chanchanebʼ jun li ululchʼiichʼ malaj jun li selular li truuq roksinkil joqʼe naraj ut joqʼe inkʼaʼ.
KʼOXLA AʼIN: Ma naxkʼutbʼesi li nakaakʼe saʼ Internet naq nakaawaj naq ebʼ li junchʼol teʼxjuntaqʼeeta ribʼ aawikʼin ut naq kaʼajwiʼ chaawix teʼaatinaq? (GÁLATAS 5:26).
LI TATRUUQ XBʼAANUNKIL
KʼOXLA CHIʼUS CHANRU NAKAAWOKSI EBʼ LI KʼANJELOBʼAAL CHʼIICHʼ
Wi nakaawoksi chiʼus li Internet ut inkʼaʼ nakaakanabʼ naq aʼan ttaqlanq saʼ aabʼeen, tatruuq chi aatinak rikʼinebʼ laawamiiw ut xkawresinkil laawanjik rikʼinebʼ.
LI NAʼLEBʼ LI NAXKʼE LI SANTIL HU: «Li rahok [...] inkʼaʼ naxsikʼ xchaabʼilal xjunes» (1 CORINTIOS 13:4, 5).
K’e reetal ebʼ li naʼlebʼ li taawaj xyuʼaminkil malaj tzʼiibʼa li nakaakʼoxla:
-
Moko kaʼaj tawiʼ taataqla junaq li esil saʼ selular malaj saʼ Internet rehebʼ laawamiiw, yal bʼan aatinak rikʼinebʼ saʼ kristiʼaanil.
-
Chup laaselular malaj maawoksi naq yooqat chi aatinak rikʼinebʼ li junchʼol.
-
Xaqabʼ jarubʼ li hoonal taawoksi re wank saʼ Internet.
-
Kʼe aachʼool chi rabʼinkil ebʼ li junchʼol.
-
Bʼoq junaq laawamiiw li yook xnumsinkil junaq li rahilal.
