Kansi bantu ya nkaka ya ke sadilaka ba-apareyi kaka sambu na kuta kinduku ti bantu ke kutanaka ti mambu yai . . .

• bo ke kuditulaka ve na kisika ya banduku na bo.

• bo ke kudimonaka bo mosi mpi ke kudiwaka bo mosi.

• bo ke kuditudilaka dikebi na kisika ya kutudila bantu ya nkaka dikebi.

KUDITULA NA KISIKA YA BANTU YA NKAKA

Sambu na kuzaba mutindu muntu ya nkaka ke kudiwa, beto fwete baka ntangu sambu na kuyindula yandi. Kusala yo ke vandaka mpasi kana beto ke tanga mpi ke sonika ba message mingi to ke tala-tala bafoto mpi bima ya nkaka ya bantu ke tula na Internet.

Kana nge kele ti ba message mingi, yo ta vanda mpasi nde nge pesa mvutu na message yina nduku mosi me tindila nge. Nge lenda mona bonso nde yo ke lomba nde nge pesa nswalu bamvutu na ba message yonso, yo vanda ya mfunu to ve, na kisika ya kutula dikebi sambu na kuzaba inki nduku na nge kele ti yo mfunu.

MAMBU YA KUYINDULA: Inki mutindu nge lenda landa ‘kuditula na kisika ya banduku’ na ngentangu nge ke tindila bo ba message na apareyi?​—1 PIERE 3:8.

MAWI YA KUDIWA NGE MOSI

Bantu ya nkaka ya siansi salaka eksperiansi mosi. Bo monaka nde bantu ke kudiwaka mbi kana bo me lutisa ntangu mingi na Internet. Bo tubaka nde kutala bafoto ya mambu yina bantu ya nkaka ke sala ke bikaka bantu ya nkaka ti ngindu nde bo me lutisa ntangu ya mpampa.

Katula yo, kana muntu ke tala bafoto ya kitoko yina bantu ya nkaka me tula na Internet, bantangu ya nkaka yandi ke monaka bonso nde yandi kele ve ti luzingu ya mbote. Yo lenda sala nde yandi yindula nde bantu yonso ke lutisaka ntangu ya mbote kansi yandi, yandi ke zingaka bonso na boloko.

MAMBU YA KUYINDULA: Kana nge kele na Internet, inki mutindu nge lenda bwa ve na mutambu ya kudifwanisa ti bantu ya nkaka mpi kulemba nitu?—BAGALATIA 6:4.

KUDITUDILA DIKEBI

Longi mosi sonikaka nde yo ke monanaka bonso nde bana ya nkaka ya nzo-nkanda na yandi ke vandaka bwimi mpi bo ke sosaka kaka banduku yina ta sadilaka bo mambu ya mbote. Bantu ke zolaka kinduku ya mutindu yina kaka sambu na kubaka mambote mosi buna. Muntu lenda yantika kumona banduku na yandi bonso ordinatere to telefone yina yandi lenda sakana ti yo mutindu yandi me zola.

MAMBU YA KUYINDULA: Keti bima ya nge ke tulaka na Internet ke monisaka nde nge kele ti mpeve ya kutesana to nde nge ke kuditudilaka dikebi kuluta ndilu?​—BAGALATIA 5:26.

TADILA MUTINDU NA NGE YA KUSADILA BA-APAREYI

Kana ba-apareyi kele pana sambu na kusadisa nge kansi ve sambu na kutwadisa nge, yo ta sadisa nge na kusolula ti banduku na nge mpi nkutu na kukumisa kinduku na beno ngolo.

Pona bandongisila yina nge ta sadila, to sonika bangindu ya nge kele ti yo.

• Sala bikesa sambu na kusolula ti muntu na kisika ya kutindilaka yandi kaka ba message

• Bumba telefone na nge (to sala nde yo dila ve kana muntu me binga to kana message me kota) ntangu nge ke solula ti bantu

• Fiotuna ntangu yina nge ke lutisaka na kutala bafoto yina bantu me tula na Internet to mambu yina bo me sonika

• Kuma muntu yina ke widikilaka na dikebi

• Sosa kubaka bansangu ya nduku yina ke mona mpasi