Zwelopili ya Bumapanga-Panga Ikona Kuama Cwañi Silikani Samina ni Babañwi?
Zwelopili ya bumapanga-panga yatusa, kakuli batu bakona kuambolisana ka kuitusisa lifoni, ma-email, ni mawebusaiti a kulumelana ka ona litaba, niha basapili mwa sibaka silisiñwi. Batu bao baitusisanga lipangaliko ze ka nzila yeswanela.
Nihaikulicwalo, batu babañwi baitusisanga feela zwelopili ya bumapanga-panga kuli baambole ni balikani babona. Batu babacwalo bakona kutahelwa ki butata bobulatelela:
-
Kusanahanisisa maikuto a balikani babona.
-
Kuikutwa hahulu bulutu ni kuikutwa kusaba ba butokwa.
-
Kunahana hahulu ka za bona kufita mobanahanela ka za balikani babona.
ZEMUSWANELA KUZIBA
KUUTWISISA MAIKUTO A BABAÑWI
Kuli luzibe maikuto a mutu, lutokwa kuba ni pilutelele. Kueza cwalo kutaata haiba lupateha kubala ni kuluma mashango amañata kamba haluli fa mawebusaiti a kulumelana ka ona litaba.
Ka linako zeñwi kukona kumibela taata kualaba kashango ka mulikanaa mina haiba muamuhezi mashango amañata. Mulelo wamina ikaba wa kubata kualaba mashango kaufela emuamuhezi kufita kutusa mulikanaa mina yatokwa tuso.
ZA KUNAHANISISA: Mukona kubonisa cwañi kuli mwautwela babañwi butuku hamulumelana ni balikani bamina tushango ka kuitusisa lipangaliko?—1 PITROSI 3:8.
KUIKUTWA KUSABA BABUTOKWA
Babatisisi babañwi nebafumani kuli batu babañata baikutwanga kusaba babutokwa hamulaho wa kutanda nako yeñata fa webusaiti ya kulumelana ka yona litaba. Babatisisi ba nebatalusize hape kuli mutu ukona “kuikutwa kuli hakuna zaezize mwa bupilo,” habona lika zebabeile babañwi fa mawebusaiti akulumelana ka ona litaba.
Kuzwa fo, mutu habona maswaniso amande ebabeile babañwi fa mawebusaiti a kulumelana ka ona litaba, ukona kuikutwa kuli haikoli bupilo sina babañwi. Mane kukona kubonahala inge kuli batu kaufela baikola bupilo, ki yena feela yasaikoli.
ZA KUNAHANISISA: Mukona kuambuka cwañi mukwa wa kuibapanyanga ku babañwi hamuitusisa mawebusaiti a kulumelana ka ona litaba?—MAGALATA 6:4.
KUNAHANA HAHULU KA ZA MINA
Muluti yomuñwi naañozi kuli bana ba sikolo bahae babañwi banani buitati mi batabelanga feela kuba ni balikani babakona kubatusa. * Bulikani bobucwalo buitingile feela fa lika zakona kufumana mutu. Mutu ukona kukalisa kuunga balikani bahae sina sipangaliko sakona kuitusisa ka linako zeñwi ni kusitima hatabela.
ZA KUNAHANISISA: Kana lika zemubeyanga fa mawebusaiti a kulumelana ka ona litaba libonisa kuli munani mukwa wa kukangisana kamba kunahana hahulu ka za mina feela? —MAGALATA 5:26.
ZEMUKONA KUEZA
MUNYAKISISE MOMUITUSISEZA LIPANGALIKO
Haiba muitusisa hande zwelopili ya bumapanga-panga, ikamitusa kuambolanga ni balikani bamina mane ni kutiisa silikani samina.
SIKUKA SA MWA BIBELE: “Lilato . . . halibati zalona feela.”—1 MAKORINTE 13:4, 5.
Mukete liakalezo zemukona kutabela kuitusisa kamba muñole liakalezo zamina.
-
Mulike kuambolanga luli ni batu kufita kulumanga feela tushango kamba ma-email
-
Mubeyange kwatuko foni yamina (kamba kukusufaza kwa mulumo wayona) hamuambola ni babañwi
-
Mukusufaze kwa nako yemutandanga fa mawebusaiti a kulumelana ka ona litaba
-
Mube bateelezi babande
-
Muambole ni mulikanaa mina ya kopana ni miinelo yetaata
^ para. 17 Mokuboniselizwe mwa buka yebizwa Reclaiming Conversation.
Hape Mwendi Mwakona Kutabela Litaba Ze
MUZUHE!
Se ku Talusa ku ba Mulikani yo Munde
Batu ba bañata ba ikutwa kuli ku ba ni balikani ba bande ki kwa butokwa. Ki lika mañi ze kona ku mi tusa ku ba mulikani yo munde ku ba bañwi? Taba ye, i nyakisisa likuka zee ne ze tusa, ze fumaneha mwa Bibele.
MUZUHE!
Mwa ku Boniseza Mikwa ye Minde ha mu Lumelana Mashango ni ba Bañwi
Kana ki ku bonisa kashwau ku kauleza ngambolo ka mulelo feela wa ku bala kashango? Kamba ku sa isa pilu kwa kashango, ka mulelo feela wa ku zwelapili ni ngambolo ya mina?
