Inoko bantu bamo bavudile kwisamba na balunda nabo kupityila’nka ku bya busendwe, babwanya kwikala na makambakano a . . .

• kubulwa kwitūla pa kyaba kya balunda nabo.

• kwimona bu badi bunka ne amba kudi kyobabudilwe.

• kwita mutyima’nka abo bene pa kyaba kya bakwabo.

KWITŪLA PA KYABA KYA BAKWABO

Pa kwivwanija mwiivwanina muntu, tufwaninwe kwitūdila’ko kitatyi kya kumulangila​—kintu kyoketubwanyapo kulonga na kutuma misapu ne kutwela pa marezo a mīsambo pa Entelenete.

Kyaba kimo shi udi na misapu mivule mu kya busendwe, padi ukakomenwa kulondolola ku misapu ya balunda nobe. Ukata mutyima ku kulondolola bukidibukidi ku misapu yonso pa kyaba kya kukwasha mulunda nobe usakilwa bukwashi.

LANGULUKA’PO: Le i muswelo’ka obwanya kwikala nyeke na “mutyima wa kulangila bakwenu” poingidija bya busendwe mwanda wa kwisamba na balunda?​—1 PETELO 3:8.

KWIMONA BU KUDI KYOBUDILWE

Bakimbi bamwene amba, bantu bavule beivwananga bibi pa kupwa kupityija kitatyi kilampe pa marezo matumbe a mīsambo. Bano bakimbi bafudile ku kunena’mba kutala mafoto a bilonga bakwabo kubwanya kupa muntu “milangwe ya amba i kutupu kintu kya mvubu kyalonga.”

Kadi, kutala mafoto mayampe atūla bantu pa Entelenete, kubwanya kulengeja boba beatala bedingakanye nabo, ne kwityepelwa. Ne kadi, babwanya kumona bu bantu bakwabo badi na būmi buyampe, inoko abo na būmi butyani.

LANGULUKA’PO: Le i muswelo’ka obwanya kuleka kwidingakanya na bakwenu poingidija marezo a mīsambo?​—BENE NGALATEA 6:4.

KWITA MUTYIMA ABE MWINE

Mwadimu umo walembele amba, bandi bana ba masomo bamo badi besakila ne kukimba’nka balunda bebalongela bintu. * Kipwano kya uno muswelo kimaninanga’nka pa bintu bimwena muntu mu bulunda. Muntu ubwanya kumona balunda nandi bu bingidilwa bibwanya kwingidijibwa ne kushitwa kitatyi kyonso kyasaka.

 LANGULUKA’PO: Lelo byobya byotūla pa Entelenete bilombola’mba usakanga kwitāka, nansha’mba witele mutyima bininge?​—BENE NGALATEA 5:26.

BANDAULA MUSWELO OINGIDIJA BYA BUSENDWE

Shi bya busendwe i mwingidi obe pa kyaba kya kwikala mfumobe, bikakukwasha wisambe na balunda nobe, enka ne kwimupwanya bininge.

Tonga’po madingi okasaka kwingidija, nansha kulemba milangwe yobe.

• Wisambe bininge na bantu (pa kyaba kya kwibatumina misapu ku telefone nansha ku olodinatele)

• Kitatyi kyowisamba na bakwenu, tyepeja diwi dya telefone

• Tyepeja’ko kitatyi kyokimba bya kukimba pa marezo a mīsambo

• Teja bakwenu senene

• Ita’ko mulunda nobe udi mu bitatyi bya makambakano