Vino Ivyakupangapanga Vingalenga Ucuza Winu na Antu Yauze Ukuya
Ivyakupangapanga vingalenga cangukile antu yaili aali uku mpanga izipusane ukulanzyanya ukuomvya mameseji, ma email, nanti inzila zyuze izya pa intaneti. Fwandi nga caya vivyo ala antu yaa yakuomvya ivyakupangapanga mu nzila isuma.
Lelo antu yamwi aakaomvya sana ivyakupangapanga pa kulanzyanya na auze yakakwata intazi zii pisika . . .
-
yakata ukwika sana mano kuli vino ya cuza yao yakuyuvwa.
-
yakauvwa sana icitendwe nupya yakayuvwa ukuti iyalekeleziwa.
-
yakaika sana mano uku vintu ivya palwao ukucila ukwika mano kuli yauze.
VINO MULINZILE UKUMANYA
KULANGULUKILAKO
Pa kulangulukilako cikalondekwa ukwika sana mano kuli vino yauze yakulondekwa, nomba cikatala sana ukucita vii ndi cakuti itupamviwa ukwika ivintu vingi pa intaneti nu kulemba mameseji.
Ndi cakuti mukupokelela ma meseji aingi, cingaamutalila ukwasuka mamesenji yano auzo iyamutumila. Limwi mungalonda ukwasuka sile ma meseji zuwa zuwa ukwaula nu kulola ukuti auzo yamwi yakulondekwa uwazwilizyo.
VINO MULINZILE UKWELENGANYAPO: Mungacita uli pakuti mutwalilile ‘ukulangulukilako’ ya cuza inu lino mukuomvya ivyakupangapanga pa kulanzyanya nayo?—1 PETULO 3:8.
KUYUVWA UWA SILE SILE
Yamwi aakalondelezya yazana ukuti antu aingi yakauvwa sana uyi pa cisila ca kuomvya intaneti pa nsita ikulu. Nupya yazana nu kuti ndi cakuti antu yakulola ivikope alino ni vintu vyuze vino yauze iika pa intaneti cikalenga yalola kwati pasi ivyampomvu vino yene yacita umu umi.
Cuze icakuti, nga yalola ivikope ivisuma vino yauze iika pa intaneti cikalenga yauvwa uyi nu kwelenganya ukuti yene ivintu vitayazipila umu umi. Cikaya vivyo pa mulandu wakuti, cikaloleka kwati antu aakaika ivintu pa intaneti yene yakaipakizya sana umi lelo yauze yene foo.
VINO MULINZILE UKWELENGANYAPO: Lino mukuomvya intaneti, mungacita uli pakuti yauze yatauvwa uyi pa mulandu na vino mukaika pa intaneti?—GALATIYA 6:4.
KWIKA SANA MANO UKU VINTU IVYA PA LWINU KUCILA UKWIKA MANO UKU YANTU YAUZE
Mwalimu umwi walanzile ukuti, cikaloleka kwati ya kasukulu yamwi yaya na ukaitemwe pano yakalonda sile ukusoolola ya cuza aakuti “yayacitilako ivintu vimwi”. Ya cuza ya musango uwo yakaika sile mano kuli vino yalakwata ndi cakuti yapanga icuza nu muntu umwi. Umuntu angatandika ukulola ukuti ya cuza yaya wakwe compyuta nanti foni, ino angaomvya pa nsita imwi lelo pa nsita yuze yene foo.
VINO MULINZILE UKWELENGANYAPO: Uzye vino mukaika pa intaneti vikalangilila ukuti mukalonda ukucimvyanya na yauze nanti ukuti mukaika sana mano kuli mweineco? —GALATIYA 5:26.
VINO MULINZILE UKUCITA
MWACEECETA VINO MUKAOMVYA IVYAKUPANGAPANGA
Ndi cakuti mukuomvya ningo ivyakupangapanga kucila ukuleka ivilivyo vyamutungulula, cilamwazwa ukulalanzyanzya ningo na ya cuza inu nupya mulaya na ucuza usuma na aliyo.
CISINTE CA MULI BAIBO: “Ukutemwa . . . kusicita ivya kuizanzya.”—1 KOLINTO 13:4, 5.
Soololinipo vino mungatemwa ukuomvya pali vii vili apisika , nanti mulembe vino mukwelenganya ukuti ivingamwazwa.
-
Mwaezya ukulanzyanya na antu (kucila ukuyatumila sile mameseji nanti ma email)
-
Mwaika foni ukutali (nanti ukutinika pakuti itanga ilile) lino mukulanzyanya na antu yauze
-
Mwacefyako insita ino mukasumba ala mukulola ivikope nanti ivintu vyuze vino antu yauze iika pa intaneti
-
Mwaaya ya kakutika aasuma
-
Mwatumila ya cuza aakupita umu ntazi zikome
