Ve ku pangesa vuino tekinologia. Vutuhu ngoco, vamo ve ku hitukila ha tekinologia linga va simutuile na vavusamba vavo . . .

• ka ve ku hasa ku vuila vakuavo cikeketima.

• ve ku livua vulika na vungoco.

• ve ku lituala cikuma mana vavene ku hiana ku tuala mana vakuavo.

CIKEKETIMA

Cikeketima ca pua ku lihaka mu cihela ca mukuetu, kaha linga tu hase ku mu kuasa tua pande ku uana ntsimbu ya ku mu singanieka. Evi via vikalu ku vi linga nga tuli ha lahako. Muomu nga tu kovela mu rede social tue ku tanguka na via vingi.

Ngeci mukemuo, nga mua tambula vimesage via vingi ci mi kaluuila ku kumbulula mesage ya umo kavusamba. Muomu vutumbe vuenu vu ka pua ku zima vimo vimesage linga mu kale na cihela mu telefone, kaha ci ka mi kaluuila ku nongonona ngecize umo kavusamba a tondeka vukuasi.

VI MUA PANDE KU HILULA: Vati mu hasa ku pua “vakua nkeke” nga mu simutuila na umo kavusamba mu ku pangesa tekinologia?—1 PETULU 3:8.

VULIKA NA VUNGOCO

Vamo vakua ku tondesesa va uana nguavo vantu vavengi ve ku livua vungoco mu nima ya ku kala ntsimbu ya kama mu rede social. Ku tala vifoto na viuma vikuavo vi ve ku haka vantu mu virede social ce ku lingisa muntu ku livua vungoco muomu na vihisilaho ntsimbu.

Cikuavo naua, ku tala vifoto via cili vi ve ku haka vantu mu virede social vie ku lingisa muntu a lisetekese na vakuavo. Muomu vifoto viaco vie ku solola ngue vantu vaco vali mu ndzolela ni mu muono ua cili kaha muntu a hasa ku singanieka ngueni ikeye lika ali mu lamba.

VI MUA PANDE KU HILULA: Nga mu pangesa rede social, vati mu hasa ku liniunga ku ku lisetekesa na vakuenu?—NGALATA 6:4.

KU LITUALA CIKUMA MANA

Umo mulongisi ua nongonuene ngueni vamo vandongesi veni va pua tuvinga mu sukuma, ve ku tonda lika vavusamba vaze va hasa ku va kuasa. Muomu nguavo: “Ku likata na uze, nevi vi nji uanaho viahi.” * Ni nguetu, muntu ue ku likata na vakuavo nga a tondeka lika vukuasi, nga na puisamo vizango vieni kaha a tsiha vusamba vuaco.

VI MUA PANDE KU HILULA: Vuno vi mue ku haka mu rede social vie ku muesa ngecize mua kala na cimbembesi ca ku limuesa ni ku lituala cikuma mana ni?—NGALATA 5:26.

PANGESENU VUINO TEKINOLOGIA

Nga yenu mue ku tumina tekinologia, i hasa ku mi kuasa ku simutuila na vavusamba venu kaha na ku kaniamesa vusamba vuenu navo.

Hangulenu vinguli vi mu tonda ku pangesa ni lisonekelenu vienu.

• Ku simutuila na vantu citona meso (mu cihela ca ku va tuma lika mesage)

• Hakenu ku mukulo (ni tepululenu) cikumo ca telefone nga muli na ku simutuila na vakuenu

• Tepululenu ku ntsimbu i mue ku kala mu rede social mu ku tanda na ku tala vi va linga vakuenu

• Puenu mukua ku halakana ua cili

• Simutuilenu na kavusamba ali na ku hita mu visoti