¿Tleka tecnología uelis kichiuas ayakmo ximouika iuan moyolikniuan?
Uelis timotlapouiskej iuan oksekimej maski uejka katej, uelis tikintitlaniliskej mensajes, correo electrónico, uelis inmiuan timotlapouiskej ika videoconferencias noso itech redes sociales. Sapanoua tlapaleuiaj dispositivos electrónicos.
Pero sekimej san non kichiuaj para motlapouiskej iuan inyolikniuan uan uelis kinpanos tlen nikan ijkuilitok.
-
Ayakmo kinmiknomatij akinmej inmiuan mouikaj.
-
Momachiliaj inselti.
-
San kintekipachoua tlen kinpanoua.
MONEKI TIKMATIS
MA TITEAJSIKAMATIKAN
Tikinmajsikamatiskej oksekimej tla achto timokuayejyekouaj ken momachiliaj. Pero amo uelis ijkon tikchiuaskej tla san tiktlajtoltijtokej tlen kajki itech redes sociales uan nochipa san tikintitlanij mensajes.
Tla tikinpiaj miak mensajes, san niman nochi tikinnankiliskej uan amo tikpaleuiskej se toyolikni tlen okinekiaya ma tikpaleuikan.
XIMOKUAYEJYEKO: ¿Ken uelis tikteititis melauak tikinmajsikamati moyolikniuan ijkuak tikintitlaniliaj mensajes? (1 PEDRO 3:8).
UELIS TIMOMACHILISKEJ TOSELTI
Ixtlamatkej okitakej ijkuak oksekimej sapanoua katej itech redes sociales amo kuali momachiliaj. Noijki okitakej ijkuak san tikitaj fotos kanin mota tlen oksekimej kichiuaj noso tlen kijkuilouaj non ‘uelis kichiuas ma timokuayejyekokan amitlaj ipati tikchijtokej’.
Ijkuak tikitaj fotos kanin mota itlaj kualtsin okichijkej oksekimej, uelis timokuayejyekoskej oksekimej sapanoua yolpakij uan tejuan amo.
XIMOKUAYEJYEKO: ¿Tlen uelis tikchiuas para amo tikchiuas ken oksekimej ijkuak katej itech redes sociales? (GÁLATAS 6:4).
SAN TECHTEKIPACHOS TLEN TECHPANOUA
Se akin tlamachtia okijto akinmej momachtiaj itech escuela san kintekipachoua tlen kinpanoua porque san mouikaj iuan akinmej kinpaleuiaj. Sekimej san kinekij ma kinpaleuikan, ik non, inmiuan mouikaj. Xamo ikaj uelis mokuayejyekos iyolikniuan ken se computadora noso se teléfono, san moneki kinpaleuiskej pero satepan kinkajteuaj.
XIMOKUAYEJYEKO: ¿Tlen niktlalia itech internet kiteititia nikneki nimotlatlanis iuan oksekimej uan san nechtekipachoua tlen ne nikneki? (GÁLATAS 5:26).
UELIS IJKIN TIKCHIUAS
XIMOKUAYEJYEKO KEN TIKITA TECNOLOGÍA
Tla timopaleuia ika tecnología pero tikmati timonauatis, uelis timotlapouis iuan moyolikniuan uan okachi inmiuan timouikas.
PRINCIPIO BÍBLICO: ‘Akin tetlasojtla amo kitemoua san tlen ye kipaktiaʼ (1 CORINTIOS 13:4, 5).
Nikan ijkuilitok seki tlamantli, xikpejpena tlen tikneki tikchiuas noso xikijkuilo okse tlamantli:
-
Niknotsas akin nikneki iuan nimotlapouis uan amo san ma nikintitlanili mensajes noso correos electrónicos.
-
Oksekan niktlalis noteléfono uan amo ma tsitsilinto ijkuak nimotlapouijtos iuan oksekimej.
-
Ayakmo okachi nikinmitas fotos uan tlen kijkuilouaj itech redes sociales.
-
Nikinkakis oksekimej ijkuak nechtlapouiskej.
-
Niknotsas se noyolikni ijkuak tlajyouis.
