Thekinolotši e ka Senya Segwera sa Gago le Batho ba Bangwe Bjang?
Matšatši a, le ge batho ba dula kgole le kgole, ba ka kgona go boledišana ka go romelana melaetša, di email, go founelana ka bidio le ka go diriša dipoledišano tša inthaneteng (goba social media). Batho bao thekinolotši e a ba hola.
Eupša batho bao ba dirišago thekinolotši feela go bolela le bagwera ba bona, gantši . . .
-
ga ba na taba le maikwelo a bagwera ba bona.
-
ba lewa ke bodutu.
-
ba nagana kudu ka bona go e na le go nagana ka bagwera ba bona.
SEO O SWANETŠEGO GO SE TSEBA
KWELOBOHLOKO
Go re re kwele motho bohloko, re swanetše go nagana ka yena pele. Seo se ka ba thata ge e ba re swaregile ka go bala le go romela melaetša e mentši le go lebelela dipoledišano tša inthaneteng.
Ge o na le melaetša e mentši, o ka feleletša o bona okare go araba melaetša yeo e fo ba o mongwe wa mešomo yeo o swanetšego go e dira letšatši le letšatši. O ka ikhwetša o nyaka go no e araba ka pejana gore e fele, o sa kwe le gore e reng e bile o ka se kgone go bona ge mogwera wa gago a hloka thušo.
SEO O KA NAGANAGO KA SONA: O ka bontšha bjang gore ‘o kwela bagwera ba gago bohloko’ ge o diriša thekinolotši go bolela le bona?—1 PETRO 3:8.
GO LEWA KE BODUTU
Banyakišiši ba bangwe ba hweditše gore batho ba bantši ba be ba ikwa ba nyamile ka morago ga gore ba fetše nako e ntši ba tsene dipoledišanong tša inthaneteng. Banyakišiši bao ba ile ba phetha ka gore ge motho a dula a lebelela dinepe tša go bontšha gore batho ba bangwe ba dira eng, a ka feleletša a “ikwa a sentše nako ya gagwe.”
Le gona, ge motho a dula a lebeletše dinepe tša go kgahliša tšeo ba bangwe ba di beilego, a ka thoma go ipapetša le bona. A ka bona eka ba ipshina ka bophelo mola yena a lewa ke bodutu.
SEO O KA NAGANAGO KA SONA: Ge o diriša social media, o ka dira’ng gore o pheme go ipapetša le batho ba bangwe?—BAGALATIA 6:4.
GO INAGANELA O LE TEE
Morutiši yo mongwe o lemogile gore okare ba bangwe ba barutwana ba gagwe, ba kgetha bagwera bao ba ka ikholago ka bona. Segwera sa mohuta woo se bontšha gore motho o naganne ka yena fela. Motho a ka thoma go lebelela bagwera ba gagwe e le melaetša yeo o ka no go e bula le go e tswalela ka go rata.
SEO O KA NAGANAGO KA SONA: Na seo o se pharago inthaneteng se dira gore go bonagale eka o phadišana le batho ba bangwe goba o inaganela o le tee. —BAGALATIA 5:26.
SEO O KA SE DIRAGO
DIRIŠA THEKINOLOTŠI GABOTSE
Ge o kgona go diriša thekinolotši gabotse, e ka go thuša gore o kgone go boledišana le bagwera ba gago le go tiiša segwera sa lena.
KELETŠO YA BEIBELE: “Lerato . . . ga le nyake tša go ikhola.”—1 BAKORINTHE 13:4, 5
Kgetha ditšhišinyo tšeo o nyakago go di diriša goba o ngwale tša gago.
-
Go bolela le batho re lebantše difahlego (go e na le go bolela le bona ka melaetša goba ka di-email fela)
-
Go beela founo ka thoko ge ke bolela le batho (goba go tima modumo wa yona)
-
Go fokotša nako yeo ke e fetšago ke bogetše dinepe goba ke bala dilo tšeo ba bangwe ba di ngwadilego inthaneteng
-
Go ithuta go ba motheetši yo mobotse
-
Go ipha nako ya go boledišana le mogwera wa ka yoo a wetšwego ke mathata
You May Also Like
PHAFOGA!
Mogwera wa Kgonthe ke wa Mohuta Mang?
Batho ba bantši ba nagana gore go bohlokwa gore motho a be le bagwera ba kgonthe. O ka ba mogwera wa kgonthe bjang go ba bangwe? Sehlogo se se ahlaahla melao ya motheo e mene yeo e hwetšagalago ka Beibeleng.
PHAFOGA!
Go Bontšha Mekgwa ge o Ngwalelana Melaetša
Na ke go hloka mekgwa go šitiša poledišano ka go fo lebelela molaetša? Goba na ke go hloka mekgwa go hlokomologa molaetša e le feela gore o tšwele pele ka poledišano?
