Ovipuka Ulinga Mono Telefone No Mono Tambeleti No Mono Komputatole Vikalesa Ñgeni Oupanga Wove Na Vakuenyi?
Ovanthu vevali veli movilongo vielikalela, vapondola okuhipulula nawa mokulituma onomesasi nono email, nokulilikalela otyo veliete. Pala ovanthu ovo ono telefone nono komputatole mbesukisa unene.
Mahi ovanthu vapopia vala nomapanga avo ko telefone nono komputatole, vapondola . . .
-
okuhakala nokankhenda nomapanga avo.
-
okukala nounye.
-
okusoka vala kuvo avehesuku nomapanga avo.
ETYI WESUKISA OKUNOÑGONOKA
OKANKHENDA
Opo tukale nokankhenda nomapanga etu, tuesukisa omuvo wokusoka kuvo. Mahi tyipondola okutupuiya okusoka ku vakuetu tyina tukahi nokutuma onomesasi nokutanga onomesasi nokutala ono foto nono vidiu mo internete.
Mokueenda kuomuvo upondola okusoka okukumbulula vala onomesasi opo uhakale nonomesasi ononyingi nokumbunyima-mo, mahi ohamono okuti pena epanga liove limwe liesukisa okukuatesuako.
SOKA KUETYI: Tyina utuma onomesasi komapanga ove, oñgeni upondola okulekesa okuti una umwe ‘okankhenda’ navo? — 1 PETULU 3:8.
OUNYE
Ovanthu vamwe vokuatanga unene, vapopia okuti ovanthu kavelitehelela nawa tyina vamakala omuvo omunyingi mo internete, mokonda tyina omunthu amakala omuvo omunyingi mo internete nokutala ono foto nonovidiu mba vakuavo, usoka okuti “ngwe naina kalingile-ale natyike tyesukisa.”
Tupu tyina omunthu atala ono foto mba vakuavo novipuka valinga, upondola okuhimbika okulieleka navo. Upondola okusoka okuti vakuavo veli vali nawa tyiponae, nokusoka okuti utupu-ale ovipuka oviwa alinga.
SOKA KUETYI: Tyina uli mo internete oñgeni upondola okulityilika okulieleka na vakuenyi? — OVA GALATAS 6:4.
OKUSOKA VALA KUOVE
Omulongesi umwe wapopia okuti, vamwe povalongwa vae ankho vasoka vala kuvo, valinga vala oupanga na vana vevekuatesako. Omunthu ngoo upondola okusoka okuti, omapanga ae ekahi vala ngotelefone apondola okumanga-manga vala tyina ahanda, pamwe einiangela vala opo.
SOKA KUETYI: Okuti ono foto nono vidiu upaka mo internete mbulekesa okuti uhanda okulilolela na vakuenyi nokusoka vala ku ove? — OVA GALATAS 5:26.
ETYI UPONDOLA OKULINGA
TALA OÑGENI OVE UTALA ONO TELEFONE NONO KOMPUTATOLE
Inkha tutumina ono telefone nono komputatole mbetu, atuhayeke mbututumine, matyitukuatesako okutomphola nawa nomapanga etu nokupameka oupanga wetu.
OMBIMBILIYA YATI: “Wohole kaovola vala ouwa wae.” — 1 OVA KOLINDU 13:4, 5.
Nthinda povipuka vimwe upondola okulinga, ankho umona okuti pena ovikuavo upondola okulinga vihoneka pombuelo.
-
Okutomphola nomunthu otyo tuli pomphangu ike (tyipona okuvetuma vala onomesasi).
-
Tyina ndyitomphola na vakuetu, otelefone yange mandyiiholeka.
-
Okutepula komuvo ndyikala mo internete nokutala ono foto no novidiu mba vakuetu.
-
Okutehelela nawa omapanga ange.
-
Okupopia nepanga liange lina otyitateka.
