Eaa ta te Apinga Apaipai ka Akatupu ki Toou Pirianga Oa?
Ae, na roto i te tuku karere, imere, vitio karangaranga, e te social media, māmā ua i nga tangata i te tuatua ki tetai e tetai noatu e te noo ra raua i tetai enua ke. Ka taangaanga meitaki raua i te apinga apaipai.
Inara ko tetai aronga, na te taangaanga anga i te apinga apaipai me tuatua ki to ratou oa, ka akatupu mai i te manamanata mei teia rai . . .
-
kare ratou e akaari i te ngakau aroa.
-
ka manako maromaroa.
-
ka akamanako ia ratou uaorai kare i to ratou oa.
TAAU KA ANOANOIA KIA KITE
NGAKAU AROA
Ei akaari i te ngakau aroa, ka anoanoia tatou kia akamanako i te manako o tetai oa. Kare teia i te mea māmā me e maata ta ratou tuku karere e te akarakara i te social media.
Me maata taau karere, ka riro ei āka angaanga i te paupau atu i te karere a toou au oa. Pou ua te taime i te takore i taau karere e kare koe e turuturu atu i toou oa tei inangaro tauturu.
AKAMANAKO ANA: Akapeea koe me akaari i te “aroa taeake” me taangaanga koe i te apinga apaipai i te tuatua atu ki toou au oa?—1 PETERO 3:8.
MAROMAROA
Kiteaia mai i roto i tetai kimikimianga e maata te au tangata tei maromaroa no te akarakara ua anga i te social media. Akapapu mai te aronga kimikimi e me akara koe i te au tutu e ta tetai ke e rave ra, ka riro te reira ei akatupu “i te manako e te kaimoumou taime ra koe.”
Te akara katoa anga i te au tutu ta tetai ke i tuku mai, ka akatupu i te manako e mea reka kore toou oraanga, no te mea akaraanga mataora te katoatoa, inara e maromaroa tikai toou oraanga.
AKAMANAKO ANA: Me taangaanga i te social media, eaa taau ka rave kia kore koe e akaaite ia koe uaorai ki tetai ke?—GALATIA 6:4.
MANAKO IA KOE UA
Tata tetai puapii e e karapii tetai pae o tana tamariki apii, e e inangaro ua i te au oa te ka rave i te au mea na ratou. * Penei ka akamanako tetai pae i tona au oa mei te komupiuta rai te ka taangaangaia e te tamate atu me kare aia e inangaro i te akarongo ia ratou.
AKAMANAKO ANA: Ko taau e tuku ra ki runga i te Initaneti, te akaari maira ainei e e tu taemoemo toou me kore te manako ua ra ia koe uaorai?—GALATIA 5:26.
TAAU KA RAVE
ME TAANGAANGA I TE APINGA APAIPAI
Me riro te apinga apaipai ei tavini noou kare ei pu, ka tauturu te reira ia koe i te tuatua ki toou au oa e te akaketaketa i toou pirianga kia ratou.
KAVEINGA PIPIRIA: “Kare [te aroa] e kimi i te meitaki nona uaorai.”—1 KORINETIA 13:4, 5.
Iki i te au manako taau ka inangaro i te rave, me kore tata i toou uaorai manako.
-
Tauta i te pukapuka ki te tangata (ma te kore e tuku karere ua me kore tuku imere)
-
Akaruke (me kore tamate) i taau tereponi me pukapuka ki tetai ke
-
Akaiti mai i te tuatau taau e akapou ra i te akarakara i te social media
-
Akarongo meitaki
-
E ringi me kore aravei atu i te oa te tupu ra te manamanata kiaia
^ para. 17 No roto mai i te puka Reclaiming Conversation.
Ka Reka Katoa Koe i Teia
UI TE AU MAPU E
Eaa Taku ka Tau Kia Kite no te Tuku Anga i te Tutu i Runga i te Initaneti?
Te tuku anga i taau tutu i runga i te initaneti, e ravenga mama no te karangaranga ki toou au oa e te ngutuare, inara ka o mai te kino me tuku tutu.
