Lege so a-appareil ayeke sara ngangu na ndö ti songo ti mo na akamarade ti mo
Grâce na message, email, vidéoconférence nga na aréseaux sociaux, a yeke ngangu ape na azo use so ayeke na ambage ti kodro so ayo mingi ti sara lisoro. Ti ala, ala sara kua na a-appareil na lege ni.
Me, ambeni zo so asara kua gï na a-appareil ti ala ti sara lisoro na akamarade ti ala apeut . . .
-
ti comprendre asentiment ti akamarade ni ape.
-
ti bâ so ala yeke gï ala oko nga ala yeke ye oko ape.
-
ti pensé mingi na ndö ti ala wani ahon ti pensé na akamarade ti ala.
YE SO MO DOIT TI HINGA
ZIA TERÊ TI MO NA PLACE TI ZO
Ti tene e zia terê ti e na place ti zo, a lingbi e mû ngoi ti pensé na aye so agbu bê ti lo; ye so apeut ti duti ngangu na ngoi so e yeke na gbâ ti amessage ti diko, ti tokua ni nga ti bâ aye so a posté na ndö ti aréseaux sociaux.
Tongana mo yeke na amessage mingi, a yeke ngangu na mo ti répondre na amessage ti akamarade ti mo kue. A peut ti sara si mo ye gï ti répondre hio na amessage ahon ti gbu li na ndö ti bezoin ti mbeni kamarade ti mo.
TI GBU LI NA NDÖ NI: Tongana nyen la mo peut ti ‘hinga ti zia terê ti mo na place’ ti akamarade ti mo na temps so mo yeke sara kua na a-appareil ti causé na ala?—1 PIERRE 3:8.
MO BÂ SO MO YEKE YE OKO APE
Mbeni gingo nda ti ye afa so mingi ti azo asentir terê ti ala nzoni ape na peko ti so ala mû ngoi mingi na ndö ti aréseaux sociaux. Na nda ni, gingo nda ti ye ni afa so bango afoto nga na afini ye so ambeni zo aposté apeut ti sara si mbeni zo abâ so lo buba ngoi ti lo senge senge.
Na ndö ni, ti bâ apendere foto so azo aposté apeut ti sara si mo haka terê ti mo na ambeni zo. A yeke mo bâ mo tene zo kue apassé mbeni pendere ngoi, me mo yeke ennuyé terê ti mo.
TI GBU LI NA NDÖ NI: Na temps so mo yeke na ndö ti aréseaux sociaux, tongana nyen la mo peut ti kpe ti haka terê ti mo na ambeni zo?—AGALATE 6:4.
MO YEKE GBOTO LÊ NA NDÖ TI MO
Mbeni wafango mbeti abâ so ambeni élève ti lo ayeke pensé gï na ala wani nga ala ye ti tene akamarade ti ala la asara aye ndali ti ala. Mara ti akamarade tongaso aye gï ti wara ye na mbage ti akamarade ti ala. Zo tongaso apeut ti bâ akamarade ti lo tongana mbeni application so lo peut ti sara kua na ni gï tongana lo yeke na bezoin ni.
TI GBU LI NA NDÖ NI: Eskê aye so mo yeke posté na ndö ti Internet afa so mo yeke na bibe ti mandako wala mo yeke gboto lê mingi na ndö ti mo?—AGALATE 5:26.
YE SO MO PEUT TI SARA
GBU LI NA NDÖ TI FASON SO MO YEKE SARA KUA NA A-APPAREIL
Tongana mo la mo komande a-appareil ti mo, a yeke aidé mo ti ngbâ ti causé na akamarade ti mo na même ayeke kpengba songo ti mo na ala.
MAMA-NDIA TI BIBLE: ‘Ndoye . . . agi gï aye so anzere na lo pëpe.’—1 ACORINTHIEN 13:4, 5.
Bâ aye so mo ye ti sara ye alingbi na ni, wala sû apensé ti mo wani na mbeti.
-
Tara ti causé na azo lê na lê ahon gï ti tokua message wala email na ala
-
Zia téléphone ni ayo na mo wala na silencieux na temps so mo yeke causé na azo
-
Limité ngoi so mo yeke mû ti bâ na aye na ndö ti aréseaux sociaux
-
Duti zo so amä zo nzoni
-
Iri mbeni kamarade ti mo so ayeke na yâ ti mbeni ye ti ngangu
