E Faapefea i le Faatekinolosi Ona Aafia ai Au Faauōga?
Ua mafai ona fesootaʻi tagata tusa lava pe eseese mea e nonofo ai, e ala i feʻau tusitusia, imeli ma talanoaga i le initaneti. Ua latou faaaogā le tekinolosi i se auala aogā.
E ui i lea, o isi ua faatāuaina le faatekinolosi e faatumau ai a latou faauōga, e tele ina . . .
-
lē faaalia le tigā alofa i faalogona o a latou uō.
-
lagona le tuua toʻatasi ma pei ua leai se faamoemoe.
-
manatu faapito iā i latou lava nai lo o a latou uō.
MEA E TATAU ONA E ILOA
TIGĀ ALOFA
O le tigā alofa e manaʻomia ai le onosaʻi ma manatu mamafa i le isi tagata. Peitaʻi, e lē mafai ona tatou faia faapea, pe afai o le taimi e tasi o loo siaki a tatou feʻau tusitusia ma asiasi i isi upega tafaʻilagi.
I nisi taimi pe afai e pulea oe e le faatekinolosi, o le a e lē uaʻi atu ai i se feʻau tusitusia mai i sau uō. O le a fai ai loa ma ou sini le na o le tali o le tele o feʻau tusitusia, ma lē uaʻi atu ai i se feʻau tusitusia mai i sau uō o loo manaʻomia le fesoasoani.
IA MAFAUFAU I AI: E faapefea ona e faatumauina le “tigā alofa” pe a e faaaogāina le faatekinolosi e fesootaʻi ai ma au uō?—1 PETERU 3:8.
LEAI SE FAAMOEMOE
Na taʻua i se tasi o suʻesuʻega, o le toʻatele e lē lelei o latou faalogona pe a uma ona faaalu le tele o le taimi i le upega tafaʻilagi. Na faaiʻu mai le suʻesuʻega i le manatu e faapea, o le faaalu o le tele o le taimi e matamata ai i ata ma faamatalaga e tuu e isi i a latou itulau, e mafai ai ona oo iā i latou “lagona ua latou lē faaaogā tatau le taimi.”
E lē gata i lea, o le matamata i ata mananaia e tuu e isi i luga o latou itulau, o le a lē lelei ai o tatou faalogona ma iʻu ai ina faatusatusa i tatou iā i latou. O le iʻuga, o le a e manatu o loo fiafia olaga o na tagata, ma e te ono lagona ai e leai se uiga o lou olaga.
IA MAFAUFAU I AI: E faapefea ona e ʻalofia le faatusatusa o oe i isi pe a e faaaogāina le upega tafaʻilagi?—KALATIA 6:4.
MANATU FAAPITO
Na tusi se faiaʻoga, o nisi o tamaiti o laʻu vasega e manatu faapito ma e latou te faauō na o tamaiti e faia mea e latou te mananaʻo i ai. * O na ituaiga faauōga, e na o le uaʻi atu lava i mea e maua mai i se uō. O le a amata ai ona vaai lenā tagata i ana uō e pei o se polokalame i le komepiuta, e mafai ona faaaogā ma toe tapē ese pe a lē manaʻomia.
IA MAFAUFAU I AI: Po o faaalia atu i mea ou te tuu i luga o upega tafaʻilagi, o loo oʻu faatautavā i isi po ou te manatu faapito iā te aʻu lava?—KALATIA 5:26.
MEA E MAFAI ONA E FAIA
IA ILOILO LE AUALA O LOO E FAAAOGĀ AI LE FAATEKINOLOSI
Ia aua neʻi pulea i tatou e le faatekinolosi. O le faia faapea, o le a aogā e fesootaʻi ai ma uō ma faamalosia ai faauōga.
MATAUPU SILISILI FAALE-TUSI PAIA: ʻO le alofa e lē saʻili mo lona lava lelei.’—1 KORINITO 13:4, 5.
Ia filifili se fautuaga e te manaʻo e faataʻitaʻi pe tusi sau oe lava auala.
-
Taumafai ia talanoa i tagata nai lo o le lafo atu o se feʻau tusitusia i le imeli po o se isi auala
-
Ia tuu ese lau telefoni (pe tapē le leo) pe a talanoa ma isi
-
Ia faaitiitia le taimi e faaalu i le siakiina o upega tafaʻilagi
-
Ia avea o sē e faalogologo lelei
-
Ia vili i sau uō o loo mafatia
^ pala. 17 E mai i le tusi Reclaiming Conversation.
E te Ono Fiafia Foʻi
UA FESILI MAI TALAVOU
O ā Mea e Tatau Ona Ou Iloa e Faatatau i le Tuuina o Ata i Luga o le Initaneti?
O le tuuina o ata e te fiafia ai i luga o le initaneti, o se auala faigofie e fesootaʻi ai ma uō ma aiga, ae e iai foʻi ona lamatiaga
ALA MAI!
Faaalia le Faaaloalo i Taimi e Fai ai Feʻau Tusitusia
Po o se lē faaaloalo le taofia o se talanoaga ae siaki se feʻau tusitusia? Po o se lē faaaloalo le tuu o au feʻau tusitusia e siaki i se isi taimi ae faaauau pea le talanoaga?
